निःशुल्क उपचार सेवा सहजीकरणका लागि डा. नवराज जोशी फोकल पर्सन नियुक्त

काठमाडौं, साउन २१ । स्वास्थ्य तथा खाद्य स्वच्छता मन्त्रालयले लक्षित वर्गका नागरिकलाई उपलब्ध गराइने निःशुल्क उपचार सेवालाई प्रभावकारी बनाउन डा. नवराज जोशीलाई सम्पर्क व्यक्ति (फोकल पर्सन) तोकेको छ।
मन्त्रालयले बुधबार जारी गरेको सूचनाअनुसार ‘लक्षित वर्ग निःशुल्क उपचार पोर्टल (सञ्चालन तथा व्यवस्थापन कार्यविधि, २०८३)’ बमोजिम विभिन्न अस्पतालसँग आवश्यक सूचना आदान–प्रदान, उपचारसम्बन्धी समन्वय तथा सेवा सहजीकरणका लागि डा. जोशीलाई जिम्मेवारी दिइएको हो।
मन्त्रालयले उपचारसम्बन्धी समन्वय, सूचना आदान–प्रदान तथा सेवा सहजीकरणका लागि आवश्यक परे ९८५१४६००३७ नम्बरमा सम्पर्क गर्न अनुरोध गरेको छ।
मन्त्रालयका अनुसार नयाँ व्यवस्थामार्फत सेवा प्रवाहसँग सम्बन्धित समन्वय, सूचना आदान–प्रदान तथा उपचारसम्बन्धी सहजीकरणलाई एकीकृत रूपमा सञ्चालन गरिनेछ।
यस व्यवस्थाले लक्षित वर्गका नागरिकका लागि उपलब्ध १० प्रतिशत निःशुल्क शय्या सेवा तथा विपन्न नागरिक उपचार सहायता कार्यक्रमलाई थप प्रभावकारी र सहज बनाउन सहयोग पुग्ने मन्त्रालयले जनाएको छ।