भोटेकोशी बाढी प्रभावितका लागि ३,२७९ रोपनी जग्गा पहिचान

काठमाडौं, असोज ६। भोटेकोशी नदीको बाढीबाट प्रभावित रसुवा, नुवाकोट र धादिङका अन्यत्र बसोबासको विकल्प नभएका परिवारको पुनःस्थापनाका लागि ३ हजार २ सय ७९ रोपनी जग्गा पहिचान गरिएको छ।
भूमि व्यवस्था, सहकारी, संघीय मामिला तथा सामान्य प्रशासन मन्त्रालयबाट गठित समितिले अध्ययन गरी सम्भावित पुनःस्थापना क्षेत्र सिफारिससहितको प्रतिवेदन मन्त्रालयमा बुझाएको हो।
समितिले पुनःस्थापनाका लागि तीन जिल्लामा गरी २७७ कित्ता जग्गा पहिचान गरेको छ। पहिचान गरिएका जग्गामध्ये रसुवामा १७७, नुवाकोटमा ९४ र धादिङमा ६ कित्ता रहेका छन्।
मन्त्रालयका अनुसार बाढीपछि अन्यत्र सुरक्षित स्थानमा बसोबासको विकल्प नभएका प्रभावित परिवारलाई पुनःस्थापना गर्ने उद्देश्यले सम्भावित क्षेत्रको अध्ययन गरिएको हो। समितिको प्रतिवेदनका आधारमा पुनःस्थापनाका लागि आवश्यक प्रक्रिया अघि बढाइनेछ।
भूमि व्यवस्था, सहकारी, संघीय मामिला तथा सामान्य प्रशासनमन्त्री प्रतिभा रावलको सचिवालयले उक्त जानकारी सार्वजनिक गरेको हो।