बाढी प्रभावित नेपालका लागि भारतले १० टन मानवीय सहायता र औषधि पठायो

काठमाडौं, भदाै १० । भारतले बाढीबाट प्रभावित नेपालमा राहत तथा उद्धार कार्यमा सहयोग पुर्‍याउन १० टन मानवीय सहायता तथा अत्यावश्यक औषधि पठाएको जनाएको छ।
भारतका विदेशमन्त्री डा. एस जयशंकरले बुधबार सामाजिक सञ्जालमार्फत नेपालमा बाढीबाट भएको विनाशप्रति दुःख व्यक्त गर्दै मानवीय सहायता तथा विपद् उद्धार सामग्री (एचएडीआर) र अत्यावश्यक औषधि पठाइएको जानकारी दिएका हुन्।
उनले बाढीका कारण ज्यान गुमाएका परिवारप्रति समवेदना व्यक्त गर्दै प्रभावित सबैप्रति सहानुभूति प्रकट गरेका छन्।
“यस चुनौतीको सामना गर्ने क्रममा भारत नेपाल र नेपाली जनताको साथमा छ,” जयशंकरले आफ्नो फेसबुक पोस्टमा उल्लेख गरेका छन्।
नेपालमा पछिल्लो बाढीबाट विशेषगरी रसुवा, नुवाकोटलगायत जिल्लामा ठूलो जनधनको क्षति भएको छ। प्रभावित क्षेत्रमा उद्धार, उपचार तथा राहतका लागि नेपाली सेना, नेपाल प्रहरी, सशस्त्र प्रहरी बल, नेपाल रेडक्रस सोसाइटीलगायत निकाय परिचालित छन्।