तराईमा अत्यधिक गर्मी, बाँकेको खजुरामा तापक्रम ४०.२ डिग्री सेल्सियस पुग्यो

काठमाडौं, असार १२ । देशका विभिन्न तराई क्षेत्रमा अत्यधिक गर्मी बढ्दै गएको छ। शुक्रबार दिउँसो ३:१० बजेसम्मको विवरणअनुसार सबैभन्दा बढी तापक्रम बाँकेको खजुरामा ४०.२ डिग्री सेल्सियस मापन गरिएको छ।
जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार सुदूरपश्चिम, लुम्बिनी, गण्डकी तथा बागमती प्रदेशका तराई क्षेत्रमा पछिल्ला दिनमा तापक्रम उल्लेखनीय रूपमा बढेको छ। उच्च तापक्रमका कारण जनजीवन प्रभावित हुन थालेको विभागले जनाएको छ।
महाशाखाले अत्यधिक गर्मीका कारण हुन सक्ने स्वास्थ्य समस्याप्रति सचेत रहन आग्रह गर्दै अनावश्यक रूपमा दिउँसोको समयमा घाममा ननिस्कन, प्रशस्त पानी तथा झोलयुक्त पदार्थ सेवन गर्न, हल्का कपडा लगाउन र बालबालिका, ज्येष्ठ नागरिक तथा दीर्घरोगीको विशेष हेरचाह गर्न अनुरोध गरेको छ।
विभागले आगामी केही दिन पनि तराईका विभिन्न क्षेत्रमा गर्मीको प्रभाव कायम रहने सम्भावना रहेको भन्दै आवश्यक सावधानी अपनाउन सर्वसाधारणलाई आग्रह गरेको छ।