विपद् प्रभावित जिल्लामा राहत समन्वय गर्न ११ क्लस्टरका लिड्स र को–लिड्सबीच बैठक

काठमाडौँ, असोज २२ । हालैको भारी वर्षाका कारण बढी क्षति पुगेका जिल्लाहरूमा राहत समन्वय र वितरण प्रभावकारी बनाउन राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडिआरआरएमए)मा ११ वटै क्लस्टरका लिड्स र को–लिड्स निकायबीच समन्वय बैठक सम्पन्न भएको छ।

यही असोज १७ देखि २० गतेसम्मको अविरल वर्षाबाट प्रभावित जिल्लाहरूमा राहत कार्यका दोहोरोपन रोक्ने र स्रोत व्यवस्थापनलाई एकद्वार प्रणालीमार्फत केन्द्रित गर्ने उद्देश्यले प्राधिकरणको सभाहलमा बैठक आयोजना गरिएको थियो।

बैठकमा सहभागी संघीय मन्त्रालयहरू (क्लस्टर लिड्स) र विभिन्न निकायहरू (क्लस्टर को–लिड्स) ले आफ्ना–आफ्ना क्षेत्रबाट भइरहेका राहत गतिविधिको जानकारी साझा गरेका थिए।

प्राधिकरणका कार्यकारी प्रमुख दिनेश भट्टले सबै सरोकारवालाहरूलाई अन्तरनिकाय समन्वय गर्दै “एकद्वार प्रणाली” अपनाउन र राहत तथा उद्धार गतिविधि प्रभावित क्षेत्रमा केन्द्रित गर्न आग्रह गरेका थिए।

“राहत र पुनर्लाभका गतिविधि दोहोरो नपर्ने गरी साझा समन्वय अत्यावश्यक छ। यसका लागि सबै निकायहरू एकीकृत रूपमा अघि बढ्नुपर्छ,” भट्टले बैठकमा भने ।

विपद्‌को पूर्वतयारीदेखि प्रारम्भिक पुनर्लाभसम्मका लागि ११ वटा क्लस्टर गठन गरिएको छ। ती क्लस्टरहरूमा खाद्य सुरक्षा, स्वास्थ्य, पोषण, खानेपानी तथा सरसफाइ, शिक्षा, सुरक्षा, आवास, शिविर (क्याम्प) समन्वय, बन्दोबस्ती, प्रारम्भिक पुनर्लाभ र आपतकालीन सञ्चार रहेका छन् ।