नागार्जुनको जामाचोमा पदयात्राको क्रममा लडेर बेहोस भएकी महिलाको सेनाले गर्यो उद्धार

काठमाडौं, वैशाख ५ । काठमाडौं जिल्लाको नागार्जुन नगरपालिका–१ जामाचोमा क्षेत्रमा पदयात्रा (हाइकिङ) गर्ने क्रममा खुट्टा अल्झिएर करिब ५० मिटर तल खस्दा बेहोस भएकी एक युवतीको नेपाली सेनाको भैरवीदल गणले उद्धार गरेको छ।

धादिङ जिल्ला घर भएकी २९ वर्षीया ती महिला बैशाख ०५ गते पदयात्राको क्रममा सडकबाट चिप्लिएर भीरमा खस्न पुगेकी थिइन्। दुर्घटनापछि उनी गम्भीर घाइते भई बेहोस अवस्थामा फेला परेकी थिइन्।

घटनाको जानकारी पाएलगत्तै नेपाली सेनाको भैरवीदल गणबाट विशेष उद्धार टोली तत्काल खटिएको थियो। कठिन भौगोलिक अवस्थाको बीच पनि सैनिक टोलीले साहस र दक्षता देखाउँदै ती महिलालाई सुरक्षित रूपमा बाटोमा उकासेको थियो। स्थानीय र अन्य सहयोगीको पनि साथ पाएको टोलीले घाइते महिलाको प्राथमिक उपचार गरी थप उपचारका लागि नजिकैको अस्पताल पठाएको छ।

नेपाली सेनाले आफ्नो सामाजिक सञ्जालमा यो जानकारी सार्वजनिक गर्दै उद्धार कार्यलाई सफलता पूर्वक सम्पन्न गरेको जनाएको छ।