उपसभामुख रुवि कुमारी ‘दहेजमुक्त विवाह’मा मात्र सहभागी हुने

काठमाडौं, वैशाख ३ । प्रतिनिधिसभाकी उपसभामुख रुवि कुमारी ठाकुरले सामाजिक रूपान्तरणका लागि व्यक्तिगत तहबाटै परिवर्तन सुरु गर्नुपर्नेमा जोड दिँदै उनले आफू दाइजो लेनदेन भएका विवाहमा सहभागी नहुने स्पष्ट पारेकी छन् ।
विवाहका धेरै निमन्त्रणापत्र आफूलाई आएकाे तर तिनमा ‘दहेजमुक्त विवाह’ भन्ने स्पष्ट सन्देश समावेश नभएको र दहेजमुक्त विवाह’ भन्ने स्पष्ट उल्लेख हुनु पर्ने आवश्यकता औंल्याएकी छन्।
सामाजिक सञ्जालमार्फत आफ्नो धारणा सार्वजनिक गर्दै उनले पछिल्लो समय आफूले प्राप्त गरेका धेरै विवाहका निमन्त्रणापत्रमा दाइजोविरुद्ध कुनै स्पष्ट प्रतिबद्धता नदेखिएको उल्लेख गरिन्। यसले समाज अझै दाइजो जस्तो कुरीतिबाट पूर्ण रूपमा मुक्त हुन नसकेको संकेत गर्ने उनको भनाइ छ।
ठाकुरका अनुसार दाइजो लिनु वा दिनु मात्र होइन, दाइजोको लेनदेनमा आधारित विवाह स्वीकार गर्नु, त्यस्ता कार्यक्रममा सहभागी हुनु वा भोज ग्रहण गर्नु समेत सामाजिक रूपमा अस्वीकार्य र कानुनी रूपमा दण्डनीय अभ्यास हो। यस्तो प्रथाले महिलाको सम्मान, समानता र अधिकारमाथि प्रत्यक्ष असर पार्ने उनले बताइन्।
उनले विवाह निमन्त्रणापत्रमै “दहेज मुक्त विवाह, दाइजो लिनु र दिनु सामाजिक तथा कानुनी अपराध हो” भन्ने सन्देश राख्न आग्रह गर्दै समानतामा आधारित, सुसंस्कृत र दाइजोमुक्त विवाह अभ्यासलाई प्रोत्साहन गर्न सबैलाई आह्वान गरेकी छन्।