जापान पठाउने भन्दै ११५ जनाबाट २ करोड ८० लाख ठगी, कन्सल्टेन्सीका सीईओ पक्राउ

बुटवल, साउन २६ । जापान पठाइदिने भन्दै एक सय१५ जनाबाट २ करोड ८० लाख रुपैयाँ ठगी गरेको आरोपमा एक कन्सल्टेन्सीका प्रमुख कार्यकारी अधिकृत (सीईओ) पक्राउ परेका छन्।
पक्राउ पर्नेमा ललितपुरको महालक्ष्मी नगरपालिका–७, चाङ्गाथलीका २९ वर्षीय प्रतीक बुढाथोकी रहेका छन्। उनी गेट्सबाई इन्टरनेशनल प्रा. लि. का सीईओ हुन्।
वैदेशिक रोजगार विभागबाट जारी पक्राउ पुर्जीका आधारमा बुढाथोकीलाई नेपाल प्रहरीले २०८३ साउन २५ गते बुटवलबाट पक्राउ गरेको हो।
प्रहरीका अनुसार बुढाथोकीले गेट्सबाई इन्टरनेशनल प्रा. लि. नामक कन्सल्टेन्सी सञ्चालन गरी ११५ जनालाई जापान पठाइदिने प्रलोभन देखाएका थिए। त्यस क्रममा उनीहरूबाट विभिन्न चरणमा गरी कुल २ करोड ८० लाख रुपैयाँ रकम लिएको आरोप छ।
जापान पठाउने आश्वासन दिएर रकम लिए पनि तोकिएको प्रक्रिया पूरा नगरेको तथा रकमसमेत फिर्ता नगरेको भन्दै पीडितहरूले वैदेशिक रोजगार विभागमा उजुरी दिएका थिए। सोही उजुरीका आधारमा विभागबाट पक्राउ पुर्जी जारी भएपछि उनलाई पक्राउ गरिएको प्रहरीले जनाएको छ।
पक्राउ परेका बुढाथोकीलाई वैदेशिक रोजगारसम्बन्धी ठगीको कसुरमा आवश्यक अनुसन्धान तथा कानुनी कारबाहीका लागि सम्बन्धित निकायमा बुझाइएको छ।
प्रहरीले वैदेशिक रोजगारीका नाममा विभिन्न व्यक्ति तथा संस्थाले आकर्षक प्रलोभन देखाएर रकम असुल्ने क्रम बढिरहेको भन्दै त्यस्ता गतिविधिप्रति सचेत रहन आग्रह गरेको छ। विदेश जानुअघि सम्बन्धित व्यक्ति वा संस्थाको वैधानिकता, श्रम स्वीकृति तथा वैदेशिक रोजगारसम्बन्धी अनुमति र प्रक्रिया यकिन गर्न प्रहरीले आग्रह गरेको छ।
यस घटनामा अन्य व्यक्ति वा संस्थाको संलग्नता रहे–नरहेको विषयमा समेत अनुसन्धान भइरहेको प्रहरीले जनाएको छ।