कंगाेमा इबाेला महामारी, ८० भन्दा बढीको मृत्युु

काठमाडौं, जेठ ३ । डेमोक्रेटिक रिपब्लिक अफ कङ्गोमा फैलिएको इबोला रोगका कारण ८० भन्दा बढी मानिसको मृत्यु भएको छ । अवस्था गम्भीर बन्दै गएपछि विश्व स्वास्थ्य सङ्गठन (डब्लुएचओ) ले यसलाई अन्तर्राष्ट्रिय सार्वजनिक स्वास्थ्य आपतकाल घोषणा गरेको छ ।
स्वास्थ्य अधिकारीहरूका अनुसार देशका विभिन्न प्रभावित क्षेत्रमा इबोला संक्रमण तीव्र रूपमा फैलिरहेको छ ।
हालसम्म ८८ जनाको मृत्यु भइसकेको र ३३६ जनामा संक्रमणको शंका गरिएको स्वास्थ्य अधिकारीहरूले बताएका छन् ।यो इबोलाका लागि हाल कुनै खोप उपलब्ध छैन । यस रोगको मृत्युदर करिब ५० प्रतिशतसम्म पुग्न सक्ने बताइएको छ। प्रकोप कङ्गोको इटुरी क्षेत्रमा सुरु भएको हो, जुन युगान्डा र दक्षिण सुडानसँग सीमा जोडिएको छ । प्रारम्भिक बिरामी एक स्वास्थ्यकर्मी भएको बताइएको छ ।
संक्रमितमध्ये धेरैजसो दुर्गम क्षेत्रमा रहेका कारण उपचार तथा नियन्त्रण कार्य चुनौतीपूर्ण बनेको बताइएको छ । स्वास्थ्यकर्मीको अभाव, कमजोर स्वास्थ्य पूर्वाधार तथा जनचेतनाको कमीले अवस्था अझ जटिल बनाएको अन्तर्राष्ट्रिय निकायहरूको भनाइ छ ।
डब्लुएचओले इबोलाको संक्रमण सीमापार फैलिन सक्ने जोखिम उच्च रहेको भन्दै विश्व समुदायलाई सतर्क रहन आग्रह गरेको छ । रोग नियन्त्रणका लागि आपतकालीन स्वास्थ्य टोली परिचालन, संक्रमितको निगरानी, परीक्षण तथा खोप अभियानलाई तीव्र बनाइएको जनाइएको छ ।
इबोला एक अत्यन्त घातक भाइरल रोग हो, जसले संक्रमित व्यक्तिमा उच्च ज्वरो, कमजोरी, बान्ता, पखाला तथा शरीरबाट रक्तश्राव हुने जस्ता लक्षण देखापर्छन् । यो रोग संक्रमित व्यक्तिको शरीरबाट निस्कने तरल पदार्थको सम्पर्कबाट सर्ने गर्दछ । समयमै उपचार नपाए मृत्युदर उच्च हुने चिकित्सकहरू बताउँछन् ।
विशेषज्ञहरूले अफ्रिकी मुलुकहरूमा स्वास्थ्य सुरक्षा प्रणाली सुदृढ बनाउन तथा अन्तर्राष्ट्रिय समन्वय बढाउन आवश्यक रहेको बताएका छन् । साथै सर्वसाधारणलाई स्वास्थ्य सावधानी अपनाउन, संक्रमित क्षेत्रको यात्रा गर्दा सतर्क रहन तथा स्वास्थ्य मापदण्ड पालना गर्न आग्रह गरिएको छ ।