सरकारको नीति तथा कार्यक्रम २०८३: हवाई क्षेत्रमा ठूला सुधार गर्ने घोषणा

काठमाडौँ, वैशाख २९ । सरकारले आगामी आर्थिक वर्ष २०८३/८४ को नीति तथा कार्यक्रममा नागरिक उड्डयन क्षेत्रमा व्यापक सुधार र विस्तार गर्ने घोषणा गरेको छ। हवाई पूर्वाधार विस्तार, अन्तर्राष्ट्रिय विमानस्थलहरूको पूर्ण सञ्चालन र आधुनिकीकरण गरी भरपर्दो तथा प्रतिस्पर्धी हवाई सेवा विकास गरिने सरकारको प्रतिबद्धता छ।

निजी क्षेत्रको सहभागिता विस्तार र अन्तर्राष्ट्रिय सुरक्षा मापदण्ड कार्यान्वयनमा जोड दिँदै सरकारले नागरिक उड्डयन क्षेत्रमा संरचनात्मक सुधार गर्ने जनाएको छ। साथै, पर्यटक भिसा सेवालाई पूर्ण रूपमा अनलाइन प्रणालीमा आबद्ध गरिने र अन्तर्राष्ट्रिय विमानस्थलमा ई-गेट प्रणाली जडान गरी यात्रुको प्रतीक्षा समय घटाइने उल्लेख छ।

गौतम बुद्ध अन्तर्राष्ट्रिय विमानस्थल (भैरहवा) र पोखरा अन्तर्राष्ट्रिय विमानस्थलमा थप अन्तर्राष्ट्रिय वायुसेवा प्रदायकलाई आकर्षण गर्न कूटनीतिक पहल गरिने सरकारको योजना छ। यी कदमले नेपालको हवाई क्षेत्रलाई थप प्रतिस्पर्धी र सेवामुखी बनाउने अपेक्षा गरिएको छ।