जापानको उत्तरी क्षेत्रमा ७.५ म्याग्निच्युडको शक्तिशाली भूकम्प, टोकियोसम्म धक्का महसुस; सुनामी चेतावनी जारी

काठमाडौं, वैशाख ७ । जापानको उत्तरी क्षेत्रमा सोमबार ७.५ म्याग्निच्युडको शक्तिशाली भूकम्प गएको छ। स्थानीय समयअनुसार बिहान गएको उक्त भूकम्पले ठूलो मात्रामा कम्पन उत्पन्न गराएको छ भने सयौँ किलोमिटर टाढा रहेको राजधानी टाेकियाेसम्म पनि गगनचुम्बी भवनहरू हल्लिएका छन्।
जापानी मौसम तथा भूकम्प मापन निकायका अनुसार भूकम्पको केन्द्रविन्दु उत्तरी क्षेत्रको समुद्री भूभागमा रहेको अनुमान गरिएको छ। प्रारम्भिक रिपोर्ट अनुसार भूकम्पपछि तीन मिटर (करिब १० फिट) सम्मको सुनामी छाल आउन सक्ने चेतावनी दिइएको छ, जसका कारण तटीय क्षेत्रका बासिन्दाहरूलाई सुरक्षित स्थानतर्फ जान आग्रह गरिएको छ।
भूकम्पपछि उत्तरी जापानका विभिन्न स्थानमा विद्युत आपूर्ति अवरुद्ध भएको र यातायात सेवामा पनि असर परेको जनाइएको छ। उद्धार तथा आपतकालीन व्यवस्थापन टोलीहरू परिचालन गरिएको छ।
हालसम्म मानवीय क्षति वा पूर्ण क्षतिको विस्तृत विवरण सार्वजनिक भइसकेको छैन। अधिकारीहरूले सम्भावित परकम्प आउने सम्भावनालाई ध्यानमा राख्दै सतर्क रहन आग्रह गरेका छन्।
जापानको भूकम्प जोखिमयुक्त क्षेत्र भएकाले यस्तो प्रकृतिका शक्तिशाली कम्पनले बारम्बार जनजीवन प्रभावित हुने गर्छ। सरकारले तटीय क्षेत्रका नागरिकहरूलाई निरन्तर सूचना पालना गर्न अनुरोध गरेको छ।