आन्दोलनमा क्षति भएका भौतिक संरचना पुनर्निर्माणका लागि कोष स्थापना

काठमाडौं, असोज ९ । भदौ २३ र २४ गते भएको आन्दोलनका कारण सार्वजनिक तथा सरकारी भौतिक संरचनामा भएको क्षति पुनर्निर्माणका लागि सरकारले ‘भौतिक पूर्वाधार पुनर्निर्माण कोष’ स्थापना गरेको छ।

अर्थ मन्त्रालयले बुधबार जारी गरेको विज्ञप्तिमा भौतिक संरचनाको पुनर्निर्माण, आर्थिक पुनःस्थापना र राहत लगायतका कार्यको व्यवस्थापन गर्न उक्त कोष स्थापना गरिएको जनाएको छ।

२०८२ भाद्र २३ र २४ गते भएको आन्दोलनबाट क्षति भएका सार्वजनिक तथा सरकारी भौतिक संरचनाको पुनर्निर्माणको लागि आवश्यक आर्थिक स्रोतको व्यवस्था गरी पुनर्निर्माण तथा मर्मत, आर्थिक पुनरुत्थान, राहत र पुनर्स्थापना सम्बन्धी कार्यलाई तत्काल व्यवस्थित र प्रभावकारी बनाउन उद्देश्यले नेपाल सरकार (मन्त्रिपरिषद्) को यही असाेज ५ गतेको निर्णयबाट भौतिक पूर्वाधार पुनर्निर्माण समिति (गठन) आदेश, २०८२ जारी भएको विज्ञप्तिमा जनाइएको छ।

उक्त गठन आदेशले आन्दोलनबाट क्षति भएका भौतिक संरचनाको पुनर्निर्माण, आर्थिक पुनरूत्थान, राहत र पुनर्स्थापना सम्बन्धी कार्यको लागि स्थापना गरेको भौतिक पूर्वाधार पुनर्निर्माण कोषमा योगदानका लागि नेपाल सरकारद्वारा आव्हान गरिएको छ ।

नेपाल सरकार, प्रदेश तथा स्थानीय तह, निजी क्षेत्र, बैंक तथा वित्तीय संस्था, सहकारी, गैर सरकारी संस्था, अन्तर्राष्ट्रिय निकाय, मित्रराष्ट्र, व्यवसायी, सामाजिक संघसंस्था र व्यक्तिगत रूपमा समेत कोषमा योगदान गर्न सकिने व्यवस्था गरिएको छ।

सरकारले सबै तहका निकाय र नागरिकलाई एकताको भावनासहित सहयोग गर्न आह्वान गरेको छ। योगदान रकम करयोग्य आम्दानीमा कटौती/छुट पाउने व्यवस्था पनि गरिएको छ।