पूर्वी अफगानिस्तानमा शक्तिशाली भूकम्प, ८०० भन्दा बढीको मृत्यु

काबुल, भदाै १६ । अफगानिस्तानको पूर्वी कुनार र नंगरहर प्रान्तमा आइतबार राति गएको शक्तिशाली भूकम्पमा कम्तीमा ८०० जनाभन्दा बढीको ज्यान गएको छ भने करिब २,८०० जना घाइते भएका छन्। स्थानीय समय राति ११:४७ बजे गएको म्याग्निच्युड ६.० को भूकम्पले गाउँठाउँमा व्यापक क्षति पुर्‍याएको अन्तर्राष्ट्रिय सञ्चारमाध्यमहरूले जनाएका छन्।

अफगानिस्तानको राष्ट्रिय आपतकालीन निकायले मृत्यु संख्या बढ्न सक्ने जनाएको छ। धेरै गाउँहरू पूर्ण रूपमा ध्वस्त भएका छन् भने उद्धार टोलीहरूलाई दुर्गम भौगोलिक अवस्थाका कारण प्रभावित क्षेत्रमा पुग्न कठिनाइ भएको छ।

भूकम्प सतही (करिब १० किलोमिटर गहिराइ) भएकाले क्षति धेरै भएको विज्ञहरूले बताएका छन्। पहिरो र सडक अवरोधले उद्धार कार्य अझ जटिल बनेको छ। घाइतेहरूलाई हेलिकोप्टरमार्फत अस्पताल पु¥याउने प्रयास भइरहेको छ।

तालिबान सरकारले अन्तर्राष्ट्रिय समुदायसँग सहयोगको अपिल गरेको छ। भारत, चीन, इरानलगायत मुलुकहरूले राहत तथा उद्धार सामग्री पठाउने घोषणा गरिसकेका छन्। संयुक्त राष्ट्रसंघ र रेड क्रसजस्ता एजेन्सीहरूले पनि तत्काल सहायता गर्ने प्रतिबद्धता जनाएका छन्।

अफगानिस्तान भूकम्पीय दृष्टिले अति संवेदनशील क्षेत्रमा पर्ने भएकाले यहाँ पटक–पटक विनाशकारी भूकम्प हुने गरेका छन्। गत वर्ष मात्रै हेरात क्षेत्रमा गएको भूकम्पमा हजारौंको ज्यान गएको थियो।

एजेन्सीकाे सहयाेगमा