५८ घन्टापछि नारायणघाट–मुग्लिन सडक सञ्चालनमा

चितवन, असोज १० । तुइन खोलामा गएको ठूलो पहिरो पन्छाएपछि ५८ घन्टापछि नारायणघाट–मुग्लिन सडक पुनः सञ्चालनमा आएको छ।

मंगलबार साँझ पहिरो खस्दा दिउँसो करिब १ बजेदेखि सडक अवरुद्ध भएको थियो। बुधबार बिहानदेखि सुरु भएको पहिरो हटाउने काम बिहीबार राति १०ः४५ बजे मात्र सकिएर सडक खुला गरिएको हो।

सडक डिभिजन कार्यालय चितवनका अनुसार बिहीबार राति ७ बजेदेखि फ्लडलाइट बालेर निरन्तर काम गरिँदै सडक सञ्चालनमा ल्याइएको हो। यसअघि रातको समयमा काम गरेकाे नभए पनि लामो समयको अवरोधले यात्रुहरूलाई समस्या भएपछि विशेष व्यवस्था गरिएको हो।

सडक बन्द हुँदा हजारौँ सवारी साधन बीचमै अड्किएका थिए भने यात्रुहरू लामो समय त्रासदीपूर्ण अवस्थाबाट गुज्रिन बाध्य भएका थिए।

यसअघि पनि यही ठाउँमा गत शुक्रबार पहिरो खस्दा करिब ४५ घन्टापछि मात्रै सडक सञ्चालनमा ल्याइएको थियो।