उपत्यकासहित अन्यत्र वर्षा, मधेशमा खडेरी

काठमाडौँ, साउन १२ गते । काठमाडौं उपत्यकासहित अधिकांश स्थानमा वर्षा भइरहेपनि मधेश क्षेत्र भने सुक्खा र खडेरीको मारमा परिरहेको छ । बंगालको खाडीबाट आएको जलवाष्पयुक्त हावाले काठमाडौँ उपत्यकासहित अधिकांश स्थानमा वर्षा गराएको मौसम पूर्वानुमान महाशाखाले जनाएको छ ।

आइतबार रातिदेखि काठमाडौँ उपत्यका र आसपासका जिल्लाहरुमा पनि लगातार पानी परिरहेको छ । नुवाकोटको पानसय खोला वर्षा मापन केन्द्रमा ८५.४ मिलिमिटर वर्षा रेकर्ड भएको छ । काठमाडौँको पानीपोखरीमा ६५ मिलिमिटर, कपनमा ३६, सुन्दरीजलमा ३०, चन्द्रागिरिमा २३, त्रिभुवन अन्तर्राष्ट्रिय विमानस्थलमा २२ र बबरमहलमा १९.६ मिलिमिटर वर्षा मापन भएको छ ।

यसैगरी, भक्तपुरमा १८ मिलिमिटर, ललितपुरको टिकाथलीमा १८, खुमलटारमा १६.४, लेलेमा १३.८ र गोदावरीमा १३।४ मिलिमिटर वर्षा भएको छ ।

मधेशमा अझै केहीदिन भारी वर्षा हुने सम्भावना नभएको बताइएको छ ।