युएईमा रहेका नेपालीलाई सतर्क रहन दूतावासको आग्रह

काठमाडौं, फागुन २१ । संयुक्त अरब इमिरेट्स (युएई)मा विकसित जटिल परिस्थितिको सन्दर्भमा त्यहाँ रहेका नेपाली नागरिकलाई सुरक्षा सतर्कता अपनाउन नेपाली राजदूतावासले आग्रह गरेको छ।
अबुधाबीस्थित नेपाली राजदूतावासले बिहीबार अत्यन्त जरुरी सूचना जारी गर्दै युएई सरकारले जारी गरेका सुरक्षा मापदण्डहरू पूर्ण रूपमा पालना गर्न, अत्यावश्यक कामबाहेक यात्रा नगर्न तथा सुरक्षित स्थानमा बस्न सबै नेपालीलाई अनुरोध गरेको हो।
राजदूतावासले सुरक्षा साइरन बजेको समयमा फोटो वा भिडियो नखिच्न तथा घटनास्थलसम्बन्धी कुनै पनि तस्वीर सामाजिक सञ्जालमा पोस्ट नगर्न पनि आग्रह गरेको छ।
साथै साइरन बज्ने बित्तिकै सुरक्षा सतर्कता अपनाउँदै तुरुन्तै सुरक्षित स्थानमा जान र खतरा पूर्ण रूपमा नटरेसम्म सुरक्षित स्थानमै बस्न दूतावासले अनुरोध गरेको छ।
युएईमा रहेका नेपाली नागरिकलाई सुरक्षा सम्बन्धी सबै निर्देशन पालना गरी सतर्क रहन राजदूतावासले पुनः आग्रह गरेको छ।