मन्त्रिपरिषद्को निर्णय : राष्ट्रपतिद्वारा वैशाख २८ गते संसद्मा सम्बोधन, १५ मानार्थ वाणिज्य दूत पदमुक्त

काठमाडौं, वैशाख २५ । आज बसेको मन्त्रिपरिषद् बैठकले आगामी वैशाख २८ गते संघीय संसद्को दुवै सदनको संयुक्त बैठकलाई राष्ट्रपतिले सम्बोधन गर्ने निर्णय गरेको छ। बैठक अपराह्न ४ बजे हुनेछ।

मन्त्रिपरिषद्का अनुसार यस सम्बोधनका लागि संसद् सदस्यहरूलाई उपस्थितिको आह्वान गरिएको छ।

यस्तै बैठकले विदेशस्थित विभिन्न मुलुकमा कार्यरत १५ जना नेपाली मानार्थ वाणिज्य दूत तथा महावाणिज्य दूतलाई पदमुक्त गर्ने निर्णयसमेत गरेको छ।

अर्को, निर्णयअनुसार अन्तर्राष्ट्रिय श्रम सङ्गठन (आईएलओ) को ‘बाध्यकारी श्रम महासन्धि, १९३०’ सम्बन्धी सन् २०१४ को प्रोटोकल (नं. २९) र ‘श्रम निरीक्षण सम्बन्धी महासन्धि, १९४७’ (नं. ८१) अनुमोदनका लागि संघीय संसद्मा पेस गर्न स्वीकृति दिइएको जनाएको छ।