अन्तर्राष्ट्रिय आरोग्य दिवस आजदेखि विश्वभर मनाइँदै, नेपलको प्रस्ताव संयुक्त राष्ट्रमा स्वीकृत

काठमाडौँ, बैशाख २ । संयुक्त राष्ट्र संघले नेपालको प्रस्तावमा आज अप्रिल १५ लाई ‘अन्तर्राष्ट्रिय आरोग्य दिवस’ (इन्टरनेशनल वेलनेश डे) घोषणा गरेको छ। यसै उपलक्ष्यमा काठमाडौँको टुडिखेलमा प्रथम पटक भव्य समारोह आयोजना गरी दिवस मनाइँदै छ।

संस्कृति मन्त्रालयले शुभकामना सन्देश जारी गर्दै यस दिवसलाई सम्पूर्ण नेपाली तथा विश्ववासीका लागि आरोग्य, शान्ति र समृद्धिको प्रतीकका रूपमा लिन आग्रह गरेको छ।

पूर्व मन्त्री तथा अभियन्ता श्रद्धा श्रेष्ठले यस उपलब्धिलाई अत्यन्त व्यक्तिगत र गौरवपूर्ण भएको बताउँदै भनिन् :
“विचारलाई कार्यान्वयनमा रुपान्तरित भएको देख्दा अत्यन्त सन्तुष्टि मिल्छ। गत मार्चमा संयुक्त राष्ट्रको ‘कमिसन अन द स्टेटस अफ वुमन’ (CSW) को बैठकमा राजदूत लोकबहादुर थापासहितको नेपाली प्रतिनिधिमण्डलमा रहेर यो प्रस्ताव राख्ने सौभाग्य मैले पाएकी थिएँ। लोकबहादु थापाको प्रयासले नै यो सम्भव भएको हो।”

उनले नेपाल सरकारले सन् २०२७ लाई ‘अन्तर्राष्ट्रिय आरोग्य वर्ष’ का रूपमा मनाउने तयारी गरेकोमा खुशी व्यक्त गर्दै थपिन् : “नेपाल आरोग्य र पुनर्जीवनको गन्तव्य हो। परम्परागत मालिसदेखि हिमाली ट्रेकिङ, योगदेखि प्राचीन उपचार पद्धति, साउन्ड थेरापीदेखि जैविक खानासम्म — नेपालले शरीर, मन र आत्माको समग्र यात्रा प्रदान गर्छ। विश्वले आरोग्य खोजिरहेको छ, र नेपाल यसको स्वागत गर्न तयार छ।”

यसैबीच, आरोग्य दिवसका अवसरमा टुडिखेलमा योग, ध्यान, स्वस्थ जीवनशैली तथा परम्परागत नेपाली चिकित्सा पद्धतिसम्बन्धी विभिन्न कार्यक्रम आयोजना गरिएको छ।