चाडपर्वमा स्वीकृत भाडाभन्दा सस्तोमा हवाई टिकट बेच्न वायुसेवा कम्पनी सहमत

काठमाडौं, असोज २२ । नजिकिँदो चाडपर्वको मौका छोपेर आन्तरिक हवाई भाडा अत्यधिक बढाइएको भन्ने गुनासो सामाजिक सञ्जालमा आएपछि नेपाल नागरिक उड्डयन प्राधिकरण (क्यान)ले आन्तरिक वायुसेवा कम्पनीसँग छलफल गरेको छ।
क्यानले आज सम्बन्धित आन्तरिक वायुसेवा कम्पनीका पदाधिकारी तथा प्रतिनिधिलाई बोलाएर हवाई भाडाका विषयमा छलफल गरेको हो।
छलफलमा क्यान र वायुसेवा कम्पनीका पदाधिकारी तथा प्रतिनिधिबीच स्वीकृत भाडादरभन्दा सस्तोमा टिकट बिक्री तथा वितरण गर्ने सहमति भएको छ। साथै, उपलब्ध गराइने भाडादरबारे सम्बन्धित वायुसेवाको बिक्री तथा वितरण प्लेटफर्ममा सूचना प्रकाशन गर्ने सहमति पनि भएको छ।
क्यानका अनुसार आन्तरिक हवाई सेवाका लागि २०७३ मंसिर २७ गते तत्कालीन पर्यटनमन्त्रीस्तरीय निर्णयबाट न्यूनतमदेखि उच्चतम भाडादर निर्धारण गरिएको थियो।
चाडपर्वका बेला यात्रुको चाप बढ्ने र सोही समयमा हवाई टिकटको मूल्य बढाइएको गुनासो आउने गरेको अवस्थामा यात्रुलाई सहज र सुलभ हवाई सेवा उपलब्ध गराउने उद्देश्यले वायुसेवा कम्पनीसँग छलफल गरिएको हो।