बाल संरक्षण प्रणाली सुदृढ र बाल श्रम न्यूनीकरण गर्न जोड

हेटौंडा, चैत ५ । बाल संरक्षण प्रणालीलाई सुदृढ पार्ने र बाल श्रम न्यूनीकरणका लागि स्थानीय सरकारहरूबीच समन्वय बढाउन विशेष जोड दिइएको छ।

मकवानपुरमा आयोजित एक दिवसीय जिल्लास्तरीय अन्तरक्रिया कार्यक्रमका सहभागीहरूले बालअधिकार संरक्षणका लागि अन्तर–सरकारी समन्वयको आवश्यकता औंल्याएका हुन्। सिविन नेपालको आयोजना, शाप्ला नियरको सहयोग तथा जिल्ला समन्वय समिति मकवानपुरको समन्वयमा हेटौंडामा भएको थियो।

कार्यक्रममा बालअधिकार समितिको गठन र सुदृढीकरण, बाल कल्याण अधिकारीको भूमिका, आकस्मिक कोष परिचालन, वैकल्पिक हेरचाह, बालमैत्री स्थानीय शासन र बालबालिकाका लागि बजेट विनियोजन लगायतका विषयमा छलफल भएको थियो।

कार्यक्रमका प्रमुख अतिथि बागमती प्रदेशका सामाजिक विकास मन्त्री कञ्चन बडेले बालबालिकाको अधिकार सुनिश्चित गर्न नीति, कार्यक्रम र बजेटको प्रभावकारी कार्यान्वयनको आवश्यकता औंल्याए। कार्यक्रममा सबै १० वटै स्थानीय तहका उपप्रमुखहरू, प्रमुख जिल्ला अधिकारी वसन्त अधिकारी र सामाजिक विकास समितिका प्रतिनिधिहरूको पनि उपस्थिति रहेको थियो।