धराली बाढी पहिराेमा पाँच नेपाली हराए

काठमाडौं, साउन २३ । भारतको उत्तराखण्ड प्रदेश उत्तरकाशी जिल्लाको धरालीमा ५ अगस्टमा गएको बाढी पहिरोपश्चात् ५ जना नेपालीहरू हराइरहेका तथा घाइते भएका ४ जना नेपालीहरूमध्ये उपचारपछि ३ जना घर फर्केको र १ जनाको स्थानीय अस्पतालमा उपचार भइरहेको उत्तराखण्ड प्रहरीले जनाएको छ।

विज्ञप्तिअनुसार जिवित उद्धार गरिएका तथा मृतकको सूचिमा कुनै पनि नेपाली नागरिक नरहेको समेत राजदूतावासलाई जानकारी गराइएको छ।

बाढी पहिरोपश्चात् नेपालीहरूको अवस्था सम्बन्धमा भारतस्थित नेपाली राजदूतावासले प्रेस विज्ञप्ति जारी गर्दै उक्त जानकारी गराएकाे हाे ।

भारतको उत्तराखण्ड प्रदेश उत्तरकाशी जिल्लाको धरालीमा गए‌को भिषण बाढी पहिरोका कारण भएको धनजनको क्षतिवारे उत्तराखण्ड प्रहरीले राजदूतावासलाई उपलब्ध गराएको जानकारी अनुसार हालसम्म ३७२ जनाको सकुशल उद्धार गरिएको र घटनास्थलबाट २ जनाको शव प्राप्त भएको छ।

साथै, उक्त बाढी पहिरोपश्चात् त्यस क्षेत्रमा रहेका नेपालीहरूको अवस्था, हराइरहेका नेपालीहरूको खोजी तथा उद्धार, घाइतेहरूको उपचार एवं अन्य आवश्यक सहयोगका लागि राजदूतावासले निरन्तर रुपमा उत्तराखण्ड सरकारका सम्बन्धित निकायहरू तथा भारत सरकारको विदेश मन्त्रालयसँग समन्वय गरिरहेको विज्ञप्तिमा उल्लेख छ।