किपुलिइ थौं बाघभैरव जात्रा

काठमाडौं, भदौ १। स्वनिगःया छगू प्राचीन बस्ती किपुलिइ नांजाःगु बाघभैरव जात्रा थौं न्ह्यानाच्वंगु दु । प्रत्येक भाद्र १ गते बाघभैरव जात्रा न्यायेकेगु सांस्कृतिक परम्परा दु ।

थ्व देगः पलिस्थापाखें कीर्तिपुरय् न्हापांनिसें मानव वस्ती दुगु व लिपा वनाः बागभैरवं संरक्षण याना वयाच्वंगु थ्व वस्तीयात थुइकाच्वंगु दु । देगः परिसरय् लिच्छवीकालीन सिबें नं पुलांगु कलाकृति दु ।

कीर्तिपुरया जनताया दैनिक जीवनलिसे घनिष्ठ स्वापू दुगु थुगु बागभैरव देगलय् न्हिथंया पूजा जुइ । अथे हे बहनी विशेष पुजा यायेगु “चापुजा” धकाः पूजा यायेगु परम्परा दु । थज्याःगु पुजा छगू विशेष परिवारं दच्छिया छन्हु थःगु इच्छा कथं याइगु खः । तान्त्रिक ध्यानया नापनापं याइगु थ्व चापुजा छम्ह बज्रयानी बौद्ध धर्मावलम्बी पुरोहितं याइगु खः ।

सामान्य दिनय् मू लुखा जक चाली, तर बाघभैरव जात्राया दिं निगू लुखा चायेकाः बहनी बागभैरवया मूर्ति खतय् तयाः शहर चाःहिकेगु याइ । देगलय् बागभैरवया तःधंगु मूर्ति बाहेक निगू चिचिधंगु मूर्ति नं दु, गुकी छगू मूर्तियात शहर चाःहिकेगु याइ ।