एमालेभित्र नेतृत्व हस्तान्तरणकाे वहस चर्कियाे

काठमाडौं, जेठ ९ । नेकपा एमालेकी पूर्व उपाध्यक्ष अष्टलक्ष्मी शाक्यले पार्टी नेतृत्व हस्तान्तरणको विषय उठाउँदै अध्यक्ष केपी शर्मा ओलीलाई लक्षित गरेर सामाजिक सञ्जाल फेसबुकमार्फत टिप्पणी गरेकी छन्।

शाक्यले ओली तीन कार्यकालसम्म पार्टी नेतृत्वमा रहिसकेको उल्लेख गर्दै अब कार्यकर्ताको भावना बुझ्ने समय आएको बताएकी छन्। उनले निर्वाचनपछि गौरवपूर्ण इतिहास बोकेको नेकपा एमाले कमजोर अवस्थामा पुगेको दाबी गर्दै पार्टीलाई पुनः आन्दोलनको नेतृत्वमा फर्काउन सकिने उल्लेख गरेकी छन्।

फेसबुकमार्फत उनले अहिले पनि पार्टीभित्र दम्भ, घमण्ड र गुटगत सोच कायम रहेको आरोप लगाएकी छन्। “एमाले कुनै व्यक्तिको पेवा वा गुटको कम्पनी होइन, लाखौँ कार्यकर्ताको त्याग र बलिदानबाट बनेको पार्टी हो,” भन्दै उनले नेतृत्वमा सामूहिकता, विचार र इमानदारी आवश्यक रहेको धारणा व्यक्त गरेकी छन्।

शाक्यले अब युवा पुस्तालाई विश्वास गरेर नेतृत्व पुस्तान्तरण गर्नुपर्ने समय आएको उल्लेख गर्दै सम्मानजनक रूपमा अध्यक्ष पदबाट विदा लिन ओलीलाई सुझाव दिएकी छन्।

उनले व्यक्तिको गुणगान र चाकरीभन्दा देश र जनताको हितमा निस्वार्थ भावनाले काम गर्ने समय आएको समेत उल्लेख गरेकी छन्।