१३औँ शताब्दीको महागौरीको मूर्ति आफ्नै आसनमा फिर्ता

काठमाडौँ, वैशाख ५ । विश्व सम्पदा दिवसको अवसरमा काठमाडौँ महानगरपालिकाले राष्ट्रिय संग्रहालयमा राखिएको १३औँ शताब्दीको दुर्लभ प्रस्तर मूर्ति आफ्नै मूल स्थानमा पुनःस्थापित गरेको छ।

महागौरी अर्थात् पार्वतीको नृत्य भावमा कुँदिएको उक्त मूर्ति आज वडा नं. २० मरुस्थित गःगुठि सूर्यमुखी महादेव मन्दिर परिसरमा विधिवत् रूपमा आसनमा फिर्ता राखिएको हो।

यसअघि विभिन्न समयमा चोरी भएर विदेश पुगेका मूर्तिहरू फिर्ता गर्नुका साथै संग्रहालयको भण्डारमा रहेका मूर्तिहरूलाई पनि तिनैको मूल स्थानमा पुर्याउने महानगरको अभियानअन्तर्गत यो कार्य गरिएको हो।

महानगरपालिकाका कार्यवाहक प्रमुख (प्रशासकीय अधिकृत) डंगोलले प्राचीन मूर्तिहरूको सांस्कृतिक र कलात्मक महत्त्वबारे चर्चा गर्दै भने, “प्राचीन मूर्तिहरूमा पूर्खाको अद्वितीय सिप कुँदिएको हुन्छ। यसलाई बन्द कोठाको संग्रहालयमा होइन, आफ्नै आसनमा राखेर जनसाधारणले दर्शन र अध्ययन गर्न पाउनुपर्छ।”

महानगरपालिकाले आगामी दिनहरूमा यसैगरी अन्य ऐतिहासिक मूर्तिहरू पनि उत्खनन, पहिचान र पुनर्स्थापना गर्दै तिनको मौलिक स्थानमै सुरक्षित राख्ने प्रक्रिया निरन्तर अगाडि बढाउने जनाएको छ।