सुशासन र विपद् पूर्वतयारीलाई सरकारले उच्च प्राथमिकता दिएको छ : प्रधानमन्त्री शाह

काठमाडौं, असोज ३। प्रधानमन्त्री वालेन्द्र शाहले भ्रष्टाचार र दण्डहीनताको अन्त्य गर्दै सुशासन कायम गर्न सरकार प्रतिबद्ध रहेको बताएका छन्। संविधान दिवस तथा राष्ट्रिय दिवस, २०८३ का अवसरमा आयोजित मूल समारोहलाई सम्बोधन गर्दै प्रधानमन्त्री शाहले सुशासन विकास र समृद्धिको अनिवार्य पूर्वसर्त भएको बताए।
प्रधानमन्त्री शाहले संविधान जति राम्रो भए पनि त्यसलाई कार्यान्वयन गर्ने संयन्त्र इमानदार र सक्रिय नभए संविधान कागजमा सीमित हुने बताए। उनले भ्रष्टाचार र दण्डहीनताको जरो गहिरो रहेको उल्लेख गर्दै त्यसलाई उखेल्न सरकार प्रतिबद्ध रहेको बताए।
“सुशासन नारा होइन, काम हो। र हामी काम गरिरहेका छौँ,” उनले भने।
सरकारले प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासनयन्त्रमा राजनीतिक तटस्थता तथा सरकारी र सार्वजनिक पदमा योग्यतामा आधारित नियुक्ति प्रक्रियालाई प्राथमिकतामा राखेको प्रधानमन्त्री शाहले बताए।
उनले संघ, प्रदेश र स्थानीय तहबीच सहकारिता, सहअस्तित्व र समन्वयका आधारमा राष्ट्रिय विकासको साझा उद्देश्य हासिल गर्न संघीय सरकार प्रतिबद्ध रहेको बताए।
प्रधानमन्त्री शाहले प्रविधिको प्रयोगमार्फत सुशासनलाई थप प्रभावकारी बनाउने सरकारको योजना पनि सार्वजनिक गरे। कृत्रिम बुद्धिमत्ता, डिजिटल प्रविधि र साइबर सुरक्षालाई सँगसँगै अघि बढाउँदै नवप्रवर्तन र स्टार्टअपलाई प्राथमिकता दिएर ज्ञानमा आधारित अर्थतन्त्र निर्माण गर्ने उनले बताए।
डिजिटल सुशासनको खाकाअनुसार राष्ट्रिय डिजिटल पूर्वाधार निर्माणलाई त्यसको आधारका रूपमा अघि बढाइने उल्लेख गर्दै उनले युवाले सडकमा उठाएको सुशासनको माग प्रविधिमार्फत पनि सम्बोधन गरिने बताए।

विपद् आउनुअघि नै जोखिमसँग जुध्ने तयारी
प्रधानमन्त्री शाहले हालैको रसुवा–भोटेकोशी बाढीबाट भएको क्षति अकल्पनीय र अपूरणीय भएको बताए। बाढीमा परी मृत्यु भएका स्वदेशी तथा विदेशी नागरिकप्रति श्रद्धाञ्जली व्यक्त गर्दै उनले पीडित परिवारप्रति समवेदना र घाइतेको शीघ्र स्वास्थ्यलाभको कामना गरे।
बाढीपछि उद्धार तथा राहत कार्यमा सहयोग गर्ने मित्रराष्ट्र, अन्तर्राष्ट्रिय समुदाय, संघसंस्था, निजी क्षेत्र, राष्ट्रसेवक कर्मचारी तथा आम नागरिकप्रति उनले धन्यवाद व्यक्त गरे।
नेपाल उच्च विपद् जोखिममा रहेको उल्लेख गर्दै प्रधानमन्त्री शाहले विपद् आएपछि मात्र प्रतिक्रिया दिने नभई जोखिम न्यूनीकरण र पूर्वतयारीलाई प्राथमिकतामा राखिने बताए।
“यो तथ्यलाई हामी विपद् आइसकेपछि होइन, आउनुअघि नै सामना गर्छौँ,” उनले भने।
उनका अनुसार जोखिम न्यूनीकरण, पूर्वतयारी र प्रतिकार्यमा विशेष जोड दिइनेछ भने विपद्को पूर्वसूचना प्रणालीलाई सर्वोच्च प्राथमिकताका साथ कार्यान्वयनमा ल्याइनेछ।
प्रधानमन्त्री शाहले संविधानले विविधताबीचको एकता, सबै प्रकारका विभेद र असमानताको अन्त्य तथा विकास, समृद्धि र सामाजिक न्यायका आधारमा समतामूलक समाज निर्माणको वाचा गरेको बताए। प्रतिस्पर्धात्मक बहुदलीय लोकतन्त्र, मानव अधिकार र कानुनी राज्य नेपालको राष्ट्रिय जीवनका आधार भएको उनको भनाइ थियो।
उनले संविधानको अक्षर र भावनाप्रति सरकार पूर्णरूपमा प्रतिबद्ध रहेको बताए।
संविधान दिवस हरेक वर्ष आउने भए पनि संविधानको वास्तविक कार्यान्वयन भने इमानदार निर्णय, पारदर्शी नियुक्ति र नागरिकको घरदैलोमा पुग्ने सेवामार्फत सुनिश्चित गर्नुपर्ने प्रधानमन्त्री शाहले बताए।
“शहीदहरूको रगतले लेखेको संविधान, हामी कामले पूरा गर्छौँ,” उनले भने।
सम्बोधनको सुरुवातमा प्रधानमन्त्री शाहले नेपालको राजनीतिक व्यवस्थाको परिवर्तन र सुशासनका लागि भएका आन्दोलनमा ज्यान गुमाएका ज्ञात–अज्ञात शहीद तथा जेनजी आन्दोलनमा सहादत प्राप्त गरेकाहरूप्रति श्रद्धाञ्जली अर्पण गरेका थिए। उनले रसुवा–भोटेकोशी बाढीमा मृत्यु भएका सबै स्वदेशी तथा विदेशी नागरिकप्रति पनि श्रद्धाञ्जली व्यक्त गरेका थिए।