काठमाडौंका होटल–रेष्टुरेन्टमा धूमपान नियन्त्रण गर्न प्रशासनको निर्देशन

काठमाडौं, साउन २१ । जिल्ला प्रशासन कार्यालय काठमाडौंले होटल तथा रेष्टुरेन्टमा जथाभावी धूमपान हुने गरेको गुनासो आएपछि कानुनी व्यवस्था कडाइका साथ कार्यान्वयन गर्न सम्बन्धित व्यवसायीलाई निर्देशन दिएको छ।
बुधबार जारी गरिएको सूचनामा काठमाडौं जिल्लाभित्रका होटल तथा रेष्टुरेन्टमा हुक्का, चुरोटलगायतका सुर्तीजन्य पदार्थ अव्यवस्थित रूपमा सेवन हुने गरेको र त्यसबाट धूमपान नगर्ने व्यक्तिको स्वास्थ्यमा समेत प्रतिकूल असर परेको गुनासो प्राप्त भएको उल्लेख छ।
प्रशासनले सुर्तीजन्य पदार्थ (नियन्त्रण तथा नियमन गर्ने) ऐन, २०६८ अनुसार धूमपान गर्न मिल्ने र नमिल्ने स्थान स्पष्ट रूपमा छुट्याउन, धूमपान गर्न मिल्ने स्थानलाई चारैतर्फबाट बन्द गरी अन्य व्यक्तिलाई असर नपर्ने व्यवस्था मिलाउन निर्देशन दिएको छ।
सूचनामा होटल तथा रेष्टुरेन्ट सञ्चालकलाई कानुनी व्यवस्था पूर्ण रूपमा पालना गर्न आग्रह गर्दै प्रशासन र सम्बन्धित निकायबाट हुने अनुगमनका क्रममा ऐनविपरीत कार्य गरेको पाइए सुर्तीजन्य पदार्थ (नियन्त्रण तथा नियमन गर्ने) ऐन, २०६८ को दफा १७ बमोजिम कारबाही गरिने चेतावनी दिइएको छ।
जिल्ला प्रशासन कार्यालयले सबै होटल तथा रेष्टुरेन्ट व्यवसायीलाई धूमपान नियन्त्रणसम्बन्धी कानुनी व्यवस्था प्रभावकारी रूपमा कार्यान्वयन गर्न पनि आग्रह गरेको छ। बजारमा युवाहरूमा भेपले व्यापकता लिइरहेकाे अवस्थामा जिल्ला प्रशासन कार्यालय यसमा भने माैन रहेकाे छ ।