मनिला सम्मेलनका लागि बालबालिकाले तयार पारे सिफारिस

काठमाडौं, साउन १८ । नेपालका विभिन्न प्रदेश र विविध समुदायका ३० जना बालबालिका तथा किशोरकिशोरीले बालबालिकाविरुद्धको हिंसा अन्त्यसम्बन्धी दोस्रो विश्व मन्त्रिस्तरीय सम्मेलन (मनिला–२०२६) मा नेपालको सहभागिताका लागि सिफारिस तयार पारेका छन्।
सिविन नेपालले टेरे डेस होम्स नेदरल्यान्ड्स इन एसियाको सहयोगमा आयोजना गरेको दुईदिने परामर्श कार्यक्रममा सहभागी बालबालिकाले मानसिक स्वास्थ्य, विद्यालयमा हुने दुर्व्यवहार (बुलिङ), यौन हिंसा, बालश्रम, अनलाइन सुरक्षा तथा बाल संरक्षणका अन्य विषयमा समूहगत छलफल गरेका थिए। छलफलका क्रममा उनीहरूले आफ्ना अनुभव साझा गर्दै सामूहिक सिफारिस तयार पारेका थिए।
कार्यक्रमको समापनका अवसरमा उक्त सिफारिस राष्ट्रिय बाल अधिकार परिषद् र राष्ट्रिय मानव अधिकार आयोगलाई हस्तान्तरण गरिएको थियो।
कार्यक्रममा ‘बोगोटा प्रतिबद्धता’ को महत्व तथा प्रत्येक बालबालिकाका लागि सुरक्षित र हिंसामुक्त संसार निर्माण गर्न अर्थपूर्ण बाल सहभागिताको आवश्यकतामा जोड दिइएको थियो।
सिविन नेपालका अनुसार मनिलामा सन् २०२६ मा आयोजना हुने बालबालिकाविरुद्धको हिंसा अन्त्यसम्बन्धी दोस्रो विश्व मन्त्रिस्तरीय सम्मेलनका लागि नेपालको तयारीका क्रममा बालबालिकाको आवाज र सिफारिस समेट्ने उद्देश्यले उक्त परामर्श कार्यक्रम आयोजना गरिएको हो।