नायिका स्वस्तिमा खड्काकाे दशक यात्रा

काठमाडौं, भदाै ४। एक दशक अघि सेतो पर्दामा पहिलो पटक देखिएकी किशोरी अहिले आफ्नै यात्रामा फर्केर हेर्छिन् र भविष्यतर्फ अघि बढ्ने सङ्कल्प गर्छिन्। अभिनेत्री स्वस्तिमा खड्काले आफ्नो चलचित्र यात्राको १० वर्ष पूरा हुने अवसरमा आफ्नो भावनात्मक अनुभूति सार्वजनिक गरिन्।

“१० दिनअघि जस्तै लाग्छ,” उनले आफ्नो अनुभूति सार्वजनिक गर्दै भनिन्, “पहिलोपटक आफूलाई सेतो पर्दामा देख्दा अलिकता लाज थियो, अलिकता उत्साह र अलिकता गर्वानुभूति थियो। समयको सुई खट्खट दौडिएर १० वर्षको किशोर भइसकेछ।”

स्वस्तिमाले लेख्छिन्, उनी प्रायः पछि फर्केर जीवनलाई हेर्न मन पराउँदिनन्, किनभने यसले कहिले अहंकार त कहिले निराशा जनाउँछ। तर, यस विशेष मोडमा उनले पछाडि फर्केर हेर्न मन लागेको स्वीकार गरिन् र त्यो अनुभव आनन्ददायी रहेको बताइन्।

“यी १० वर्षमा सिकेका कुरा, भेटेका मान्छे र भोगेका क्षणले अब आउने मेरा दसौं वर्षलाई डोर्याउने छन्,” उनले भनिन्।

आफ्नो यात्रालाई ‘सिनेमाको वर्णमाला सिक्ने’ प्रक्रिया भनी व्याख्या गर्दै उनले बताइन् कि काम र अग्रजहरूको मार्गदर्शनले उनलाई यस क्षेत्रको कखरा सिकाएको र यो ज्ञान नै उनलाई भविष्यमा परिपक्व बनाउँदै लैजानेछ।

आफूलाई सहयोग गर्ने सबैप्रति आभार व्यक्त गर्दै उनले भनिन्, “मलाई स्वीकार्नुभएकोमा धन्यवाद। मलाई ‘नाइ’ भन्नुभएकोमा धन्यवाद। ममा सन्देह गर्नुभएकोमा धन्यवाद। म लड्दा उठाएर हिँडाइदिनुभएकोमा धन्यवाद। र, मेरो सपनाको अंश बनिदिनुभएकोमा धन्यवाद।”

उनले आफू सधैं प्रेमले भिजिरहन पाउने कामना गर्दै आफ्नो भविष्यको यात्राको लागि उत्साह व्यक्त गरिन्।