"अभिनव-छ्योर्तेन-मुसुरी बौद्धदर्शन तथा साहित्य सम्मान २०८२" बाट बसन्त महर्जन सम्मानित

काठमाडौं, चैत्र २८ । बुद्ध र बौद्ध दर्शनसम्बन्धी निरन्तर अध्ययन, अनुसन्धान तथा लेखनबापत आज बसन्त महर्जन "अभिनव-छ्योर्तेन-मुसुरी बौद्धदर्शन तथा साहित्य सम्मान २०८२" बाट नगद रुपैयाँ पच्चीस हजार सहित सम्मानित भएका छन् । 

छ्योर्तेन लामा र मुसुरी लामाको नामबाट अभिनव साहित्य समाज, जोरपाटीद्वारा स्थापित यो सम्मान बौद्ध धर्मदर्शनमा योगदान दिने एक साधकलाई प्रत्येक वर्ष प्रदान गर्ने गरिन्छ । यसअघि दुई जना साधक सम्मानित भइसकेका छन् । 

सम्मानित हुन पाएकोमा आभार व्यक्त गर्दै लेखक बसन्त महर्जनले यस प्रकारका सम्मानहरुबाट साधक थप प्रोत्साहित हुने र समाजमा अन्य साधकहरुलाई सकारात्मक उर्जा प्राप्त हुने विचार व्यक्त गरे । उनले मन्तव्यका क्रममा नेपाली भाषा र बौद्धधर्मबीच गहिरो सम्बन्ध भएको चर्चा गर्दै नेपाली भाषाका सुरुका अभिलेखहरु बौद्ध विषयवस्तुसँग सम्बन्धित हुने गरेको र नेपालीभाषाको उद्गम थलो मानिएको कर्णाली क्षेत्र एक समय बौद्ध राज्यको रुपमा रहेको बताए । बौद्ध धर्मदर्शनसम्बन्धी उनका एघार वटा कृतिमध्ये खश साम्राज्यमा बौद्ध धर्मको उत्थान र पतन पनि एउटा हो । 

कार्यक्रममा संस्कृतिविद् एवं लेखक शितल गिरीले सम्मानित व्यक्तित्वको परिचय दिने क्रममा आफूले उनलाई पचासको दशकदेखि पढ्न थालेको र अनुसन्धान तथा लेखनको क्षेत्रमा क्रमशः विकास गर्दै आज यस सम्मानबाट सम्मानित हुन सफल भएको बताए । 

प्रमुख अतिथी जापानका लागि पूर्व नेपाली राजदूत गणेश योञ्जनले बुद्ध र बौद्ध धर्मका लागि हामीले अझै धेरै काम गर्न बाँकी रहेको काम गर्नेहरुलाई सम्मान तथा प्रोत्साहन दिँदै जानुपर्नेमा जोड दिए । 

नेपाली साहित्य क्षेत्रको अभिवृद्धिमा समर्पित अभिनव साहित्य समाजले नियमित रुपमा साहित्य गोष्ठी गर्ने गर्दछ । यसै क्रममा आज विशेष कवि गोष्ठी गरिएको थियो । समाजका उपाध्यक्ष विमल अर्यालको सभापतित्वमा सम्पन्न भएको थियो ।