त्रिविका सवारी साधनमा सेतो नम्बर प्लेट अनिवार्य

काठमाडौं, माघ २७ । त्रिभुवन विश्वविद्यालय (त्रिवि) अन्तर्गतका सबै क्याम्पस, कार्यालय, अस्पताल तथा निकायमा प्रयोग भइरहेका सवारी साधनमा सेतो नम्बर प्लेट अनिवार्य गरिएको छ।

त्रिवि सभा तथा कार्यकारी परिषद् सचिवालयको माघ १३ गते बसेको बैठकको निर्णय अनुसार विश्वविद्यालयका सम्पूर्ण निकायका प्रमुख तथा कार्यालय प्रयोजनमा प्रयोग हुने सवारी साधनमा हाल रातो (प्राइभेट) नम्बर प्लेट रहेको भए त्यसलाई सरकारीसरह सेतो नम्बर प्लेटमा परिवर्तन गर्नुपर्ने व्यवस्थाकाे निर्णय गरिएको थियाे ।

निर्णयअनुसार २०८२ सालको आषाढ मसान्तसम्म सेतो नम्बर प्लेट बनाइसक्नुपर्ने थियाे। सो सम्बन्धमा जानकारी उपलब्ध गराउन यसअघि नै परिपत्र गरिए पनि केही निकायबाट कुनै विवरण नआएकाले पुनः जानकारी माग गरिएको त्रिवि रजिस्ट्रारको कार्यालय, सामान्य प्रशासन महाशाखाले जनाएको छ।

महाशाखाले सूचना प्राप्त भएको १५ दिनभित्र सेतो नम्बर प्लेट बनाइसकेको विवरण यथाशीघ्र पठाउन अनुरोध गरेको छ। साथै, निकायमा रहेका सवारी साधन (गाडी तथा मोटरसाइकल) को विवरण र २० वर्ष पुराना सवारी साधन को विवरणसमेत उपलब्ध गराउन भनिएको छ।

सूचना त्रिवि रजिस्ट्रारको कार्यालय, सामान्य प्रशासन महाशाखाले माघ २६ गते जारी गरेको हो।