पूर्वप्रधानमन्त्री ओलीद्वारा निर्वाचन परिणाम स्वीकार गर्दै धन्यवाद ज्ञापन

काठमाडौं, फागुन २८ । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आफ्नो पार्टीले अपेक्षित परिणाम नल्याएकोमा जनताको फैसला शिरोधार्य गरेको बताएका छन्। उनले सामाजिक सञ्जाल फेसबुकमा लेखेको स्टाटसमार्फत निर्वाचन परिणामलाई सम्मानपूर्वक स्वीकार गरेका हुन्।

पूर्वप्रधानमन्त्री ओलीले आफू र आफ्नो पार्टीले सोचेजस्तो परिणाम प्राप्त गर्न नसकेको भन्दै भनेका छन्, “यस पटकको निर्वाचनमा मैले अपेक्षा गरेजस्तो परिणाम प्राप्त गर्न सकिनँ। हाम्रो पार्टीले पनि अपेक्षित परिणाम ल्याउन सकेन। लोकतन्त्रमा अन्तिम फैसला जनताकै हुन्छ, र त्यो फैसला शिरोधार्य गर्नु म र मेरो पार्टीको कर्तव्य हो। जनताको मतलाई म पूर्ण सम्मानका साथ स्वीकार गर्दछु।”

उनले आफ्नो पार्टीको चुनाव चिह्न सूर्यमा मतदान गर्ने सम्पूर्ण मतदाता, नेता, कार्यकर्ता, स्वयंसेवक, शुभेच्छुक र समर्थकहरूप्रति हार्दिक आभार व्यक्त गर्दै भनेका छन्, “तपाईंहरूको विश्वास नै हाम्रो शक्ति हो। तपाईंहरूको साथ नै हाम्रो ताकत हो।”

निर्वाचन परिणाम आफ्नो पक्षमा नआएपछि पनि जनताप्रतिको प्रतिबद्धता र सेवाभाव कमजोर नभएको उल्लेख गर्दै अध्यक्ष ओलीले भनेका छन्, “हामी जनताकै बीचमा रहनेछौँ, जनताकै लागि काम गरिरहनेछौँ, र विश्वासको यो सम्बन्धलाई अझ बलियो बनाउँदै अघि बढ्नेछौँ।”