डोल्पामा निर्वाचन कर्मचारी तथा प्रहरीको उद्धार

काठमाडौं, फागुन २० । प्रतिनिधि सभा सदस्य निर्वाचन, २०८२ को क्रममा डोल्पा जिल्ला, शे–फोक्सुण्डो गाउँपालिका–६, फोतगाउँस्थित निर्वाचन केन्द्रमा खटिएका निर्वाचन कर्मचारी तथा प्रहरीलाई लेक लागेको कारण स्वास्थ्य समस्या उत्पन्न भएको नेपाली सेनाले जनाएको छ।

सेनाका अनुसार आज बिहान नेपाली सेनाको हवाईसाधनमार्फत उनीहरूलाई उद्धार गरी जिल्ला अस्पताल दुनै पुर्‍याइएको छ। अस्पतालमा आवश्यक उपचार भइरहेको र सबैको स्वास्थ्य अवस्था सामान्य रहेको जनाइएको छ।

सुरक्षा निकायले दुर्गम क्षेत्रमा खटिएका कर्मचारीहरूको स्वास्थ्य र सुरक्षालाई प्राथमिकता दिँदै निरन्तर निगरानी गर्ने जनाएको छ।