समानुपातिक सांसदलाई राष्ट्रिय ‘सेतु’ बन्न प्रधानमन्त्री शाहको आग्रह

काठमाडौं, वैशाख २ । प्रधानमन्त्री वालेन्द्र शाह ले समानुपातिक प्रणालीबाट निर्वाचित सांसदहरूलाई सीमित क्षेत्रीय दायराभन्दा बाहिर निस्केर देशभरका उत्पीडित, पछाडि पारिएका समुदायको सशक्त आवाज बन्न आग्रह गरेका छन् ।
बुधबार प्रधानमन्त्री तथा मन्त्रिपरिषद्को कार्यालयमा आयोजित छलफलमा बोल्दै उनले समानुपातिक सांसदहरूको भूमिकालाई समुदाय र राज्यबीचको ‘जीवित सेतु’ का रूपमा चित्रण गरे। उनका अनुसार यस्ता प्रतिनिधिहरू केवल आफ्ना क्लस्टरका प्रतिनिधि मात्र नभई राष्ट्रिय समावेशीकरणको आधारस्तम्भ हुन्।
“पहिलो प्राथमिकता आफ्ना क्लस्टरका मुद्दा उठाउनु हो, त्यसपछि राष्ट्रिय कानुन निर्माणमा केन्द्रित हुँदै समग्र देशको विकासमा योगदान दिनुहोस्,” प्रधानमन्त्री शाहले भने, “तपाईंहरू आफ्ना समुदायका लागि मात्र होइन, देशभरका समान प्रकृतिका वर्गका लागि आशाको केन्द्र हुनुहुन्छ।”
प्रधानमन्त्री शाहले आगामी पाँच वर्षसम्म सरकार र सांसदबीच निरन्तर सहकार्य रहने प्रतिबद्धता जनाउँदै नीति निर्माण र समस्या समाधानमा प्रविधिको प्रभावकारी प्रयोग अपरिहार्य भएको बताए।
छलफलमा उठेका विषयहरूमा तत्काल फलोअप गरिने र आगामी दिनमा सुझाव, समन्वय तथा संवादका लागि ‘डिजिटल माध्यम’ सधैं खुला रहने उनले स्पष्ट पारे।