मुग्लिन–नारायणगढ सडकखण्डमा पहिरो, आवागमन पूर्णरूपमा बन्द

चितवन, असोज ९ । मुग्लिन–नारायणगढ सडकखण्डको तुईन खोला पुल नजिकै पहिरो खस्दा सडक आवागमन पूर्णरूपमा अवरुद्ध भएको छ।

हिजो साँझ परेको ठूलो वर्षाका कारण राति अबेरसम्म पहिरो पन्छाउन समस्या भएको र आज बिहान ५:३० बजेदेखि नारायणगढ र मुग्लिन दुवैतर्फबाट पाँचवटा उपकरण परिचालन गरी निरन्तर काम भइरहेको सडक डिभिजन भरतपुरले जनाएको छ।

तर, सो स्थानमा स्थान अभाव (limit space) का कारण एकैपटक धेरै उपकरण प्रयोग गर्न नसकिएकोले पहिरो पन्छाउन समय लाग्ने भएको छ।

सडक डिभिजनले पूर्णरूपमा सडक सुचारु नहुन्जेलसम्म सवारी चालक र यात्रुहरूलाई वैकल्पिक सडक प्रयोग गर्न आग्रह गरेको छ।