जमैकामा ‘मेलिसा’ आँधीले ठूलो विनाश, आपतकाल घोषणा

काठमाडौं, कार्तिक १३ । क्यारिबियन द्वीप राष्ट्र जमैकामा ‘ह्युरिकेन मेलिसा’ नामक शक्तिशाली आँधीले बुधबार रातिदेखि व्यापक विनाश मच्चाएपछि सरकारले देशव्यापी आपतकालीन अवस्था घोषणा गरेको छ।

अमेरिकी मौसम पूर्वानुमान केन्द्रका अनुसार ‘मेलिसा’ आँधीले जमैकाको पश्चिमी भागमा ३०० किलोमिटर प्रतिघण्टा भन्दा बढी गतिमा प्रहार गरेको थियो। यसका कारण तीव्र हावासँगै मूसलधारे वर्षा, भीषण बाढी र भूस्खलन समेत भएको छ।

सरकारका प्रवक्ता अनुसार देशका ५ लाखभन्दा बढी नागरिक बिजुलीविहीन भएका छन् भने मुख्य सडक, पुल र अस्पतालहरूमा क्षति पुगेको छ। राजधानी किङ्सटनदेखि मोन्टेगो बे सम्मका धेरै क्षेत्रमा आवतजावत ठप्प छ।

प्रधानमन्त्री एन्ड्र्यु होलनेसले बुधबार राति देशवासीलाई सम्बोधन गर्दै भने, “यो हामीले दशकौंयताकै ठूलो प्राकृतिक विपद् झेलेकाे क्षण हो। सरकारले तत्काल राहत, उद्धार र पुनर्स्थापनाका काममा पूर्ण क्षमता लगाउनेछ।”

स्थानीय सञ्चारमाध्यमका अनुसार समुद्री तट नजिकका क्षेत्रमा चार मिटरभन्दा अग्ला छालहरू उठेका छन्, जसले सयौँ घर बगाएको प्रारम्भिक जानकारी आएको छ। धेरै नागरिक अस्थायी शिविरहरूमा बसोबास गर्न बाध्य छन्।

मौसमविद्हरूले यो आँधीलाई “इतिहासकै शक्तिशाली ह्युरिकेनमध्ये एक” बताउँदै अझै पनि भारी वर्षा जारी रहने चेतावनी दिएका छन्। उनीहरूका अनुसार, वर्षासँगै भूस्खलन र थप बाढीको जोखिम कायम छ।

संयुक्त राष्ट्रसंघ, अमेरिकन र ब्रिटिश सरकारले तत्काल मानवीय सहायता पठाउने घोषणा गरेका छन्। अन्तर्राष्ट्रिय रेडक्रसले पनि उद्धार टोली पठाइसकेको जनाएको छ।

विज्ञहरूले यस्तो तीव्र आँधी–तूफानको कारणलाई समुद्र सतहको तापक्रम बढ्नु र जलवायु परिवर्तनसँग जोड्दै चेतावनी दिएका छन्। उनका अनुसार, क्यारिबियनका साना द्वीप राष्ट्रहरू आगामी वर्षहरूमा यस्ता विपदबाट अझ बढी प्रभावित हुने सम्भावना छ।

(एजेन्सीहरूकाे सहयाेगमा)