तिलिचो र बझाङमा नेपाल टेलिकमको 4G सेवा विस्तार

काठमाडौं, असोज ३१ । सूचना, सञ्चार तथा प्रविधि मन्त्री जगदिश खरेलले मनाङको तिलिचो बेसक्याम्पमा आजदेखि सञ्चालनमा आएको नेपाल टेलिकमको 4G सेवाको प्रयोग गर्दै फिल्ड इन्जिनियर निरज गुप्तासँग भिडियो कलमार्फत संवाद गरेका छन्। नयाँ प्रविधि प्रयोगमार्फत दुर्गम क्षेत्रमा पनि सञ्चार पहुँच विस्तार भएको देख्दा आफू अत्यन्त खुसी भएको मन्त्री खरेलले बताएका छन्। उक्त सेवा मन्त्री खरेलको भिडियो कलमार्फत शुभारम्भ गरिएको थियाे ।

त्यस्तै, सुदूरपश्चिम प्रदेशको बझाङ जिल्लास्थित तलकोट गाउँपालिका–४ बुङ्गाडाँडामा पनि हिजोदेखि 4G सेवा सञ्चालनमा आएको नेपाल टेलिकमले जनाएको छ। मन्त्रीसँगको कुराकानीका क्रममा इन्जिनियर गुप्ताले 4G सेवाले स्थानीय क्षेत्रमा उद्धार कार्य तथा डिजिटल पेमेन्ट प्रणालीलाई सहज बनाएको जानकारी दिएका थिए।

मन्त्री खरेलले आफ्नो फेसबुक पेजमार्फत सञ्चार सम्पर्क अबरुद्ध हुने अवस्था आएमा नेपाल टेलिकमको १४९८, एनसेलको ९००५, इन्टरनेट सेवा प्रदायक (ISP) को ९८०१८७८९४१ र मन्त्रालयको ९८४१५२०११५ (WhatsApp) नम्बरमा खबर गर्न अनुरोध गरेका छन्। उनका अनुसार मर्मत तथा सेवा पुनःसञ्चालनका लागि सम्बन्धित प्राविधिक टोलीहरू तयारी अवस्थामा रहेका छन् ।