असोज १७ देखि २० सम्मको वर्षाबाट ४८ जनाको मृत्यु, ६ बेपत्ता

काठमाडौं, असाेज २० । यही असोज १७ गतेदेखि २० गतेसम्म देशभर भएको अविरल वर्षाका कारण विभिन्न स्थानमा पहिरो, बाढी र चट्याङका घटनामा परि ४८ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) का अनुसार यस अवधिमा ६ जना बेपत्ता र २८ जना घाइते भएका छन्।

प्राधिकरणले आइतबार साँझ ५ बजेसम्मको विवरण अद्यावधिक गर्दै मृत्यु भएका मध्ये ३९ जना पहिरोमा, ६ जना बाढीमा, २ जना चट्याङमा र १ जना अविरल वर्षाका कारण ज्यान गएको जनाएको छ। पहिरोका कारण मृत्यु हुनेमध्ये इलाममा ३१ जना, पाँचथरमा ६ जना, र काभ्रेपलाञ्चोकमा १ जना रहेका छन्।

बेपत्तामध्ये ५ जना बाढीमा (रसुवा–४, इलाम–१) र १ जना पहिरोमा (इलाम) परेका छन्। त्यस्तै, घाइतेको संख्या २८ जना पुगेको छ, जसमा १४ जना पहिरोमा, १२ जना चट्याङमा, र अन्य घटनामा घाइते भएका छन्।

विपद् घटनामा परेकामध्ये १८ जनाको हेलिकोप्टरमार्फत उद्धार गरिएको छ। तीमध्ये इलामको माइसेबुङ गाउँपालिकामा पहिरोमा फसेकी एक गर्भवती महिला र १६ जना बाढी तथा डुबानमा फसेकाहरू छन्।

सरकारले प्रभावित क्षेत्रमा उद्धार, राहत र पुनःस्थापनाका लागि सुरक्षाकर्मी परिचालन गरेको छ भने प्राधिकरणले वर्षाको जोखिम अझै कायम रहेको भन्दै सावधानी अपनाउन आग्रह गरेको छ।