पहिरोले मुग्लिन–नारायणगढ सडक अवरुद्ध, यात्रु बिचल्लीमा

चितवन, असोज ५ । मुग्लिन–नारायणगढ सडकखण्डमा गएको पहिरोका कारण यातायात अवरुद्ध भएपछि यात्रुहरू बिचल्लीमा परेका छन् । असोज ३ गते बिहानदेखि रोकिएको सडक अझै खुल्न नसक्दा सयौं सवारी साधन दुवै तर्फ थुनिएका छन् ।

सडक खुलाउन डोजर परिचालन गरिएको भए पनि निरन्तर खस्ने ढुंगा–माटोका कारण काममा ढिलाइ भएको जिल्ला प्रहरी कार्यालय चितवनले जनाएको छ ।ढुंगामाटाे निरन्तर खस्दा अँध्यारो भएपछि काम राेकिनु पर्ने अवस्थाले पनि काममा ढिला भएकाे छ ।

सडक बन्द हुँदा काठमाडौं, पोखरा, पूर्व–पश्चिम जोड्ने प्रमुख यातायात नरोकिने गरी वैकल्पिक बाटो प्रयोग गर्ने प्रयास भए पनि लामो दूरीका कारण यात्रुहरू मारमा परेका छन् । खाना, पानी र आवश्यक सामग्रीको अभावले यात्रुहरू थप समस्यामा परेको गुनासो गरेका छन् ।

जिल्ला सुरक्षा समिति, चितवन तथा स्थानीय व्यवसायीको सहयोगमा पहिरोका कारण मुग्लिन-नारायणगढ सडकखण्डमा रोकिएका यात्रुहरुलाई खाजा र पानी वितरण तथा सहजिकरण गरेकाे नेपाल प्रहरीले जनाएको छ ।

यता, सडक विभागले सुरक्षालाई मध्यनजर गर्दै सडक तत्काल खुलाउन कठिनाइ भइरहेको बताएको छ । “माटो र ढुंगाको ठूलो थुप्रो हटाउन समय लाग्छ, सम्भव भए आज साँझसम्म एकतर्फी सञ्चालन गर्ने प्रयास भइरहेको छ,” सडक डिभिजन कार्यालयका एक इन्जिनियरले बताए ।

यात्रुहरूले भने सम्बन्धित निकायलाई शीघ्र कदम चाल्न आग्रह गरेका छन् । नियमित रूपमा यस्तो समस्या दोहोरिन थालेको भन्दै स्थानीयले दीगो समाधानका लागि स्थायी व्यवस्थापन आवश्यक रहेको बताएका छन् ।