नापी अधिकृत नौ लाख रुपैयाँ घुससहित पक्राउ

काठमाडौं, १ असोज । अख्तियार दुरुपयोग अनुसन्धान आयोगले नापी कार्यालय डिल्लीबजारअन्तर्गत माछापोखरीस्थित ३ नम्बर नापी टोलीका टोली प्रमुख नापी अधिकृत डिल्लीबहादुर वलीलाई नौ लाख रुपैयाँ घुससहित पक्राउ गरेको छ।
अख्तियारका अनुसार छुट जग्गा दर्ता सिफारिससहितको मिसिल भूमि प्रशासन कार्यालय, मनमैजुमा पठाउने क्रममा अनावश्यक दुःख–हैरानी दिई घुस मागेको भन्ने सूचना तथा उजुरीका आधारमा आयोगको टङ्गालस्थित कार्यालयबाट टोली परिचालन गरिएको थियो।
आयोगको टोलीले वलीलाई घुसबापत लिइसकेको रु. ९ लाख रकमसहित काठमाडौंको टोखा नगरपालिका–५, वसुन्धरा चोकस्थित एक रेस्टुरेन्टबाट भदौ ३१ गते नियन्त्रणमा लिएको हो।
अख्तियारका अनुसार पक्राउ परेका वलीविरुद्ध घुस/रिसवत तथा भ्रष्टाचारसम्बन्धी मुद्दामा अनुसन्धान अघि बढाइएको छ। असोज १ गते विशेष अदालतको आदेशबाट म्याद थप गरी अनुसन्धान कार्य अगाडि बढाइएको आयोगका प्रवक्ता सुरेश न्यौपानेले जारी गरेको प्रेस विज्ञप्तिमा उल्लेख छ।