मन्त्रिपरिषद्का निर्णय: धितोपत्र बोर्ड अध्यक्ष छनोट प्रक्रिया अघि बढ्यो, तीन विधेयक संसदमा जाने

काठमाडौं, वैशाख ८ । प्रधानमन्त्री बालेन्द्र शाहको सचिवालयका अनुसार आज बसेको मन्त्रिपरिषद् बैठकले नेपाल धितोपत्र बोर्डको अध्यक्ष नियुक्ति प्रक्रिया अघि बढाउनेदेखि लिएर विभिन्न कानुनी संशोधनका विधेयक संसदमा पेस गर्ने महत्त्वपूर्ण निर्णय गरेको छ।

बैठकले नेपाल धितोपत्र बोर्डको अध्यक्ष नियुक्तिका लागि सिफारिस गर्न राष्ट्रिय योजना आयोगका उपाध्यक्ष डा. गुणाकर भट्टको संयोजकत्वमा तीन सदस्यीय सिफारिस समिति गठन गरेको छ। समितिमा अर्थ मन्त्रालयका सचिव डा. घनश्याम उपाध्याय र भुवन कुमार दाहाल सदस्य रहनेछन्।
यस्तै, सरकारले तीन महत्वपूर्ण ऐनहरू संशोधन गर्न बनेका विधेयक संघीय संसदमा पेस गर्न स्वीकृति दिएको छ। संशोधनका लागि अगाडि बढाइएका ऐनहरूमा नेपाल विशेष सेवा ऐन, २०४२, प्रतिनिधि सभा सदस्य निर्वाचन ऐन, २०७४ र मतदाता नामावली ऐन, २०७३ रहेका छन्।
त्यसैगरी, समस्याग्रस्त सहकारी व्यवस्थापन समितिमा नयाँ पदाधिकारी नियुक्त गरिएको छ। समितिको अध्यक्षमा डिल्लीराज आचार्य नियुक्त भएका छन् भने सदस्यहरूमा नवराज सिम्खडा र रोशन बहादुर शाक्य मनोनयन गरिएको छ।
सरकारले धितोपत्र बजारको नियमन सुदृढ गर्ने, निर्वाचन प्रणालीलाई थप प्रभावकारी बनाउने तथा सहकारी क्षेत्रको सुधारमा ध्यान केन्द्रित गर्ने संकेतस्वरूप यी निर्णयहरू लिएको बताइएको छ।