गण्डकी प्रदेश र लुम्बिनी प्रदेशको एक-दुई स्थानमा धेरै भारी वर्षाको सम्भावना

काठमाडौं, भदाै ३० । जल तथा माैसम विज्ञान विभागले हाल देशभर साधारणतया बदली रहेको तथा गण्डकी प्रदेश र लुम्बिनी प्रदेशको एक-दुई स्थानमा धेरै भारी वर्षाको सम्भावना रहेकोले भू-क्षय, बाढी, पहिरो तथा गेग्रान बहाव, शहरी तथा तराई क्षेत्रहरूमा डुबानको जोखिम रहेको जनाएको छ ।

विभागका अनुसार बागमती प्रदेश, गण्डकी प्रदेश र लुम्बिनी प्रदेशका धेरै स्थानहरूमा तथा कोशी प्रदेश, कर्णाली प्रदेश र सुदूरपश्चिम प्रदेशका केही स्थानहरूमा हल्का देखि मध्यम वर्षा भइरहेको छ। गण्डकी प्रदेश र लुम्बिनी प्रदेशको एक-दुई स्थानमा मेघ गर्जन चट्टयाङ्ग सहित भारी वर्षा पनि भैरहेको छ।

विभागकाे पूर्वानुमान अनुसार दिँउसो गण्डकी प्रदेश, लुम्बिनी प्रदेश र कर्णाली प्रदेशका थोरै स्थानहरुमा तथा कोशी प्रदेश र बागमती प्रदेशको एक-दुई स्थानमा भारी वर्षाको पनि सम्भावना रहेको छ।

साथै, गण्डकी प्रदेश र लुम्बिनी प्रदेशको एक-दुई स्थानमा धेरै भारी वर्षाको सम्भावना रहेकोले भू-क्षय, बाढी, पहिरो तथा गेग्रान बहाव, शहरी तथा तराई क्षेत्रहरूमा डुबानको जोखिम रहेको विभागले जनाएको छ । ठूला तथा साना नदी नाला र खोलाहरूमा पानीको सतह बढ्न सक्ने हुँदा दैनिक जन-जीवन, कृषि, स्वास्थ्य, पर्यटन, नदी क्षेत्र आसपासका निर्माण कार्य, सडक तथा हवाई यातायात समेत प्रभावित हुन सक्ने भएकोले आवश्यक सतर्कता तथा पूर्व तयारी अपनाउन विभागले सूचित गरेकाे छ ।