प्रतिनिधिसभा मतगणनामा राष्ट्रिय स्वतन्त्र पार्टी अग्रस्थानमा

काठमाडौं, फागुन, २३ । प्रतिनिधिसभा सदस्य निर्वाचनअन्तर्गत हालसम्म सार्वजनिक मतगणनाको प्रारम्भिक विवरणअनुसार राष्ट्रिय स्वतन्त्र पार्टी अग्रस्थानमा देखिएको छ। आयोगको तथ्यांकअनुसार राष्ट्रिय स्वतन्त्र पार्टीले सबैभन्दा धेरै १८ स्थानमा जित हासिल गरेको छ भने ९९ स्थानमा अग्रता कायम गरेको छ।
निर्वाचन आयोगले सार्वजनिक गरेको मतगणनाको आधारमा हालसम्म २४ जना उम्मेदवार विजयी भइसकेका छन्।
त्यसपछि नेपाली कांग्रेसले ४ स्थानमा विजय हासिल गरेको छ र ११ स्थानमा अग्रता लिएको देखिएको छ।
यस्तै नेपाल कम्युनिस्ट पार्टी (एकीकृत मार्क्सवादी–लेनिनवादी) ले १ स्थानमा जित निकाल्दा ११ स्थानमा अग्रता कायम गरेको आयोगको तथ्यांकमा उल्लेख छ। त्यसैगरी नेपाल कम्युनिस्ट पार्टी (माओवादी केन्द्र) ले १ स्थानमा जित हात पारेको छ भने ११ स्थानमा अग्रता बनाएको छ।
यस्तै श्रम संस्कृति पार्टीको ३ स्थानमा अग्रता, राष्ट्रिय प्रजातन्त्र पार्टी र एक स्वतन्त्रकाे १/१ स्थानमा अग्रता रहेकाे छ ।
निर्वाचन आयोगका अनुसार देशभर प्रतिनिधिसभाका कुल १६५ प्रत्यक्ष निर्वाचन क्षेत्रमध्ये विभिन्न स्थानमा मतगणना जारी रहेकाले परिणाम क्रमशः सार्वजनिक भइरहेका छन्। प्रारम्भिक मतगणनाले केही नयाँ तथा पुराना राजनीतिक दलबीच कडा प्रतिस्पर्धा देखिएको संकेत गरेको छ।
मतगणना जारी रहेकाले आगामी घण्टामा नतिजामा थप परिवर्तन आउन सक्ने आयोगले जनाएको छ।