भूमि व्यवस्थापनका नाममा रकम असुल्नेमाथि कानुनी कारबाही हुने

काठमाडौं, साउन १९ । भूमि व्यवस्था, सहकारी, संघीय मामिला तथा सामान्य प्रशासन मन्त्रालयअन्तर्गतको भूमि समस्या समाधान समितिले भूमिहीन दलित, भूमिहीन सुकुम्बासी तथा अव्यवस्थित बसोबासीको व्यवस्थापनका नाममा रकम असुल्ने वा अनुचित लाभ लिने व्यक्तिमाथि कानुनी कारबाही गरिने चेतावनी दिएको छ।
समितिले जारी गरेको सूचनामा पछिल्लो समय निवेदन दर्ता गरिदिने, निस्सा दिलाइदिने वा जग्गा व्यवस्थापनको काम छिटो गराइदिने बहानामा केही व्यक्तिले सेवाग्राहीबाट रकम असुलेको गुनासो प्राप्त भएको जनाएको छ।
यस्ता गतिविधि पूर्ण रूपमा गैरकानुनी भएको उल्लेख गर्दै समितिले कुनै पनि व्यक्तिलाई रकम नदिन सेवाग्राहीलाई आग्रह गरेको छ। भूमि व्यवस्थापनसम्बन्धी सबै प्रक्रिया सरकारले तोकेको आधिकारिक माध्यमबाट निःशुल्क वा प्रचलित कानुनबमोजिम मात्र हुने समितिले स्पष्ट पारेको छ।
समितिले सेवाग्राहीलाई कुनै पनि प्रलोभन वा झुटा आश्वासनमा नपरी आधिकारिक प्रक्रियामार्फत मात्र सेवा लिन आग्रह गर्दै गैरकानुनी रूपमा रकम असुल्ने वा अनुचित लाभ लिने व्यक्तिमाथि प्रचलित कानुनअनुसार कारबाही गरिने चेतावनी दिएको छ।
मन्त्री प्रतिभा रावलको सचिवालयका अनुसार भूमिसम्बन्धी सेवा लिन आउने नागरिकलाई सचेत रहन र कुनै पनि शंकास्पद गतिविधिबारे सम्बन्धित निकायमा जानकारी गराउन पनि अनुरोध गरिएको छ।