बालेन्द्र शाहलाई केपी शर्मा ओलीकाे बधाई

काठमाडौं, फागुन २३ । केपी शर्मा ओलीले प्रतिनिधि सभा निर्वाचनअन्तर्गत झापा ५ बाट विजयी भएका बालेन्द्र शाहलाई सामाजिक सञ्जालमार्फत बधाई दिएका छन्।
झापा–५ बाट पराजित भएका ओलीले शनिबार फेसबुकमा एक पुरानो तस्बिर राख्दै विजेता शाहलाई शुभकामना दिएका हुन्। उनले २०७९ साल असार महिनामा आफ्नै निवास बालकोटमा शाहलाई भेट्दा तबला उपहार दिएको तस्बिर साझा गर्दै निर्वाचन जितेकोमा बधाई तथा सफल कार्यकालको कामना दिएका छन्।
फेसबुकमा सार्वजनिक गरिएको उक्त तस्बिरमा ओलीले शाहलाई तबला हस्तान्तरण गरिरहेको दृश्य देखिन्छ। उक्त भेटघाट त्यतिबेला भएको थियो, जतिबेला शाह काठमाडौं महानगरपालिकाको मेयरका रूपमा निर्वाचित भएपछि विभिन्न राजनीतिक तथा सामाजिक व्यक्तित्वसँग भेटघाट गरिरहेका थिए।
ओलीले आफ्नो पोस्टमा लेखेका छन्, "बालेन बाबु, विजयको लागि तपाईंलाई बधाई!", "तपाईंको पॉचवर्षे कार्यकाल निर्विघ्न सफल रहोस्- हार्दिक शुभकामना!"

२१ गते सम्पन्न प्रतिनिधि सभा निर्वाचनमा झापा–५ बाट शाह विजयी भएका छन् भने लामो समयदेखि सो क्षेत्रमा प्रभाव राख्दै आएका ओली पराजित भएका हुन्। शाहको जितलाई नयाँ पुस्ताको राजनीतिक उदयका रूपमा समेत विश्लेषण गरिएको छ।