मनसुन थप सक्रिय, दुई दिन देशका धेरै स्थानमा भारीदेखि अति भारी वर्षाको सम्भावना

काठमाडौं, श्रावण २ । देशभर मनसुनी गतिविधि थप सक्रिय हुने भएको छ। जल तथा मौसम विज्ञान विभागले शनिबार जारी गरेको विशेष मनसुन बुलेटिनमा श्रावण २ र ३ गते (शनिबार र आइतबार) देशका अधिकांश भूभागमा वर्षा बढ्ने र केही स्थानमा भारीदेखि अति भारी वर्षा हुने सम्भावना रहेको जनाएको छ।
विभागका अनुसार हिमाली तथा पहाडी भूभागका धेरै स्थान, कोशी, बागमती, लुम्बिनी र सुदूरपश्चिम प्रदेशका तराईका धेरै स्थान तथा मधेश, बागमती र गण्डकी प्रदेशका तराईका एक–दुई स्थानमा भारीदेखि धेरै भारी वर्षाको सम्भावना छ।
यस्तै, कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका एक–दुई स्थानमा अति भारी वर्षा हुन सक्ने भएकाले उच्च सतर्कता अपनाउन विभागले आग्रह गरेको छ। देशका धेरै स्थानमा मेघगर्जन तथा चट्याङसहित मध्यम वर्षाको सम्भावना पनि रहेको जनाइएको छ।
विभागका अनुसार बंगालको खाडीमा विकसित न्यून चापीय प्रणाली उत्तर–पश्चिमतर्फ सर्ने क्रममा रहेकाले मनसुन थप सक्रिय हुने अवस्था बनेको हो।
वर्षासँगै नदी तथा खोलामा पानीको बहाव बढ्न सक्ने, पहाडी क्षेत्रमा पहिरो र तराईमा डुबानको जोखिम रहने भएकाले आवश्यक सतर्कता अपनाउन विभागले अनुरोध गरेको छ। साथै, यात्रा, कृषि तथा विपद् व्यवस्थापनसँग सम्बन्धित निकायलाई मौसमको अद्यावधिक जानकारी नियमित रूपमा पछ्याउन पनि आग्रह गरिएको छ।