कोशी र बागमती प्रदेशमा मेघगर्जन र हावाहुरी सहित वर्षा

काठमाडौं, चैत २ । देशका केही स्थानहरूमा मौसमी गतिविधि सक्रिय रहेको छ। जल तथा मौसम विज्ञान विभाग, माैसम पूर्वानुमान महाशाखाले जनाए अनुसार हाल कोशी प्रदेशका केही स्थानहरू र बागमती प्रदेशको पहाडी भू-भागको एक-दुई स्थानमा मेघगर्जन, चट्याङ र हावाहुरी सहित हल्का वर्षा भइरहेको छ।

महाशाखाका अनुसार यो वर्षा प्रणाली विस्तारै पूर्वतिर सर्दै गइरहेको छ, जसको प्रभावले पूर्वी क्षेत्रमा समेत मेघगर्जन, चट्याङ र हावाहुरी सहित वर्षा हुने सम्भावना रहेको छ।

महाशाखाले सम्भावित जोखिमबाट बच्न आवश्यक सतर्कता अपनाउन सबैमा अनुरोध गरेको छ। विशेष गरी चट्याङ र हावाहुरीका समयमा सुरक्षित स्थानमा बस्न, बिजुलीका पोल र रूखमुनि नबस्न, र आवश्यक नभएमा घरबाहिर ननिस्कन आग्रह गरिएको छ।