घुँडाको सफल शल्यक्रियापछि पुनरागमनको तयारीमा साम्बा

काठमाडौं, चैत ११ । नेपाली महिला फुटबल टोलीकी स्टार खेलाडी साबित्रा भण्डारी (साम्बा) ले आफ्नो घुँडाको सफल शल्यक्रिया सम्पन्न भएको जानकारी दिएकी छन्।

भण्डारीले सामाजिक सञ्जालमार्फत बुधबार बिहान अक्ल्याण्ड, न्यूजिल्याण्डमा डाक्टर साइमन र उनको टोलीद्वारा शल्यक्रिया सफलतापूर्वक सम्पन्न भएको बताएकी हुन्।

उनका अनुसार खाडी क्षेत्रमा हालको असहज अवस्थाका कारण कतार पुग्न कठिन भएपछि त्यहाँस्थित एस्पेटारको सुझावअनुसार न्युजिल्यान्डमै उपलब्ध विशेषज्ञमार्फत शल्यक्रिया गरिएको हो।

शल्यक्रियापछि अब चिकित्सकको निगरानीमा पुनर्स्थापनाको प्रक्रिया सुरु हुने जनाउँदै उनले अवस्था सामान्य भएपछि एस्पेटारमा नै रिह्याबलाई निरन्तरता दिने बताएकी छन्।

भण्डारीले उपचारका क्रममा विलिङ्टन र अकल्यान्डमा रहेका नेपाली समुदायप्रति आभार व्यक्त गर्दै आफ्नो क्लब विलिङ्टन फाेनिक्स तथा व्यवस्थापन टिमले शल्यक्रियाको व्यवस्थापनमा महत्वपूर्ण भूमिका खेलेको उल्लेख गरेकी छन्।

समर्थकहरूको साथ र मायाबाट प्रेरित हुँदै पुनरागमनको यात्रामा अघि बढेको उल्लेख गर्दै उनले अब सम्पूर्ण ध्यान ‘कमब्याक’मा केन्द्रित रहने बताएकी छन्।