प्रतिनिधि सभा निर्वाचन : तीन दिन सार्वजनिक बिदा

काठमाडौं, फागुन, १४। आगामी २०८२ फागुन २१ गते हुने प्रतिनिधि सभा सदस्य निर्वाचनलाई लक्षित गर्दै सरकारले तीन दिन सार्वजनिक बिदा दिने निर्णय गरेको छ।
गृह मन्त्रालयद्वारा जारी सार्वजनिक सूचना अनुसार मन्त्रिपरिषद्को निर्णयअनुसार २०८२ फागुन २० गतेदेखि २२ गतेसम्म (तीन दिन) सार्वजनिक बिदा दिइने भएको हो।
सरकारले निर्वाचनको तयारी, मतदान प्रक्रिया र मतपेटिका व्यवस्थापनलाई प्रभावकारी बनाउन बिदा दिने निर्णय गरेको जनाएको छ। मतदानको अघिल्लो दिनदेखि मतगणना प्रारम्भिक चरणसम्मको व्यवस्थापनलाई सहज बनाउन सार्वजनिक बिदा दिइएको बताइएको छ।
गृह मन्त्रालयले आज सूचना जारी गर्दै सम्बन्धित सबै निकाय तथा सर्वसाधारणलाई जानकारी गराएको छ।
निर्वाचनको सन्दर्भमा सुरक्षा व्यवस्था, मतदान केन्द्र व्यवस्थापन तथा कर्मचारी परिचालनलाई प्राथमिकतामा राखिएको गृह प्रशासनले जनाएको छ। सरकारले आम मतदातालाई आफ्नो मताधिकार प्रयोग गर्न आह्वानसमेत गरेको छ।
निर्वाचन आयोगले यसअघि नै मतदानको सम्पूर्ण तयारी अन्तिम चरणमा पुगेको जनाएको थियो। सार्वजनिक बिदाको निर्णयसँगै सरकारी कार्यालय, सार्वजनिक निकाय तथा अधिकांश शैक्षिक संस्था उक्त अवधिमा बन्द रहनेछन्।