चीनबाट ५० टन आपत्कालीन राहत सामग्री नेपाल आइपुग्यो, सुरुङ उद्धार विज्ञ पनि परिचालन

काठमाडौं, भदाै १४ । चीनले नेपालमा जारी विपद् उद्धार तथा राहत कार्यका लागि ५० टन आपत्कालीन सामग्री पठाएको छ। चिनियाँ जनमुक्ति सेना (पीएलए) को वायुसेनाका दुई वटा वाई–२० ठूला ढुवानी विमानमार्फत उक्त राहत सामग्री आइतबार बिहान काठमाडौं आइपुगेको हो।
चिनियाँ दूतावासका अनुसार स्थानीय समयअनुसार अगस्ट ३० बिहान करिब ७ बजे दुई वटा वाई–२० विमान त्रिभुवन अन्तर्राष्ट्रिय विमानस्थलमा अवतरण गरेका थिए। विमानमा चार जना चिनियाँ सुरुङ उद्धार विज्ञसहित उद्धार उपकरण समेत ल्याइएको छ।
राहत सामग्री हस्तान्तरण समारोहमा नेपालका लागि चिनियाँ राजदूत झाङ माओमिङ, विज्ञान, प्रविधि तथा नवप्रवर्तनमन्त्री महावीर पुन तथा संघीय संसद्का प्रतिनिधिसभा सदस्य धर्म केसी सहभागी भएका थिए। उनीहरूले नेपाल आएका चिनियाँ उद्धार विज्ञलाई स्वागत गरेका थिए।
चिनियाँ दूतावासका अनुसार ती विमान चीनको छेङ्दु शुआङलिउ अन्तर्राष्ट्रिय विमानस्थलबाट उडेका थिए र करिब तीन घण्टाको उडानपछि काठमाडौं आइपुगेका हुन्।
दुवै विमानमा १३ हजार २०० थान आपत्कालीन राहत सामग्री ल्याइएको छ। त्यसमा टेन्ट, कम्बल, स्लीपिङ ब्याग, हार्डट्याक तथा प्राथमिक उपचारका सामग्री रहेका छन्। सामग्रीको कुल तौल ५० टन रहेको दूतावासले जनाएको छ।
यसैबीच, थप चार जना चिनियाँ सुरुङ उद्धार विज्ञ पनि आइतबार बिहान नेपाल आइपुगेका छन्। उनीहरू नेपालमा जारी उद्धार अभियानमा सहभागी भइसकेका छन्।
चीनले नेपालमा विपद्का कारण प्रभावित क्षेत्रमा खोज तथा उद्धार कार्यलाई सहयोग पुर्‍याउन आपत्कालीन राहत सामग्री तथा प्राविधिक जनशक्ति पठाएको हो।