विपद व्यवस्थापनमा धेरै काम गर्नु पर्नेछ: डा. विशाल भण्डारी

काठमाडौं, असार ११ । नव नियुक्त रेडक्रस केन्द्रीय कार्यसमितिका पदाधिकारी तथा प्रकाेप पूर्वतयारी सञ्जाल- डिपीनेटकाे कार्यसमितिका पदाधिकारीबीच आसन्न मनसुन तथा सम्भावित विपदका सम्बन्धमा आज छलफल भएकाे छ ।

छलफलमा रेडक्रसका नवनियुक्त सभापति डा. विशाल भण्डारीले रेडक्रसलाई रिस्ट्रक्चरिङ गर्नु पर्ने अवस्था रहेकाे र अर्कोतिर विपद अघिल्लो वर्ष भन्दा चुनाैतिपूर्ण भएकाे उल्लख गरे । जल तथा माैसम विज्ञान विभागकाे याे वर्ष अधिक वर्षा र खडेरीकाे पूर्वानुमानले गर्दा विपदकाे क्षेत्रमा धेरै काम गर्नु पर्ने अवस्था रहेकाे सभापति भण्डारीले बताए । सभापतिका अनुसार विपदकाे पूर्वतयारीका रूपमा जनचेतना फैलाउने, पूर्वतयारी गर्ने जस्ता काम गरिनु पर्छ । "याे अवस्थामा कस्तो रणनीति लिएर अगाडि बढ्ने भनेर हामी छलफलकाे क्रममा छाैं, एक खाले याेजना बनिसकेको छ" सभापति भण्डारीले भने ।

सभापति भण्डारीले हामीसँग विपद व्यवस्थापनको धेरै अनुभव पनि रहेकाे तर प्रविधि नभएको उल्लेख गर्दै डिपिनेटका सदस्य, पदाधिकारी तथा प्राविधिक सल्लाहकारहरूसँग भएकाे ज्ञान विपद जाेखिम न्यूनीकरणमा संयुक्तरूपमा प्रयोग गर्न सकिने बताए ।
छलफलमा डिपीनेटका अध्यक्ष वसन्त राज अधिकारीले डिपीनेटले स्थापनाकालदेखि नै रेडक्रससँग सहकार्य गर्दै आएकाे र आगामी दिनमा पनि गरिने उल्लेख गर्दै विपदसम्बन्धी अध्ययन अनुसन्धानका कार्यलाई पनि अघि बढाउनु पर्ने बताएका थिए ।

छलफलका क्रममा रेडक्रसका महामन्त्री ऋषिराम खनालले विपद पूर्वतयारी सम्बन्धि जनचेतनाका सामग्री स्थानीय एफएमबाट प्रशारण गर्दा प्रभावकारी हुन सक्ने बताए ।

कार्यक्रममा डिपीनेटका निवर्तमान अध्यक्ष डा. राजु थापा, पूर्व अध्यक्ष तथा प्राविधिक सल्लाहकार डा. मीन पाैडेल, सल्लाहकार जीतराम लामा, बाेर्ड सदस्य श्यामबहादुर कट्टेल लगायतका वक्ताले आआफ्नो धारणा व्यक्त गरेका थिए ।